18 ning hpring WMR masat ninghtoi akyu hpyi hpawng galaw
Wunpawng Amyusha Mungbawng Rapdaw (WMR) hpaw ninghtan la lu ai (18) ning hpring masat ninghtoi akyu hpyi hpawng hpe October shata 24 ya jahpawt hkying 7:00am aten hta, WMR Rung Zuphpawng Gawk kaw galaw la lu sai lam na chye lu ai.
Wunpawng Amyusha Mungbawng Rapdaw (WMR) hpe laiwa sai 2002 ning October shata 24 ya shani hpaw shabawn dat ai, daining gaw 18 ning hpring sai rai nna, COVID-19 ana byin nga ai aten ladaw re majaw, lamang hpe dam lada ai hku nlu galaw ai raitim, akyu hpyi hpawng lamang hta ninghpum salang ni hpe saw shaga nhtawm galaw la lu sai re.
Wunpawng Amyusha Mungbawng Rapdaw gaw Jinghapw Mung hte Mungmyit Sinli Ga kaw na Wunpawng amyusha ni a lam, Wunpawng Amyusha ni hte rau nga ai kaga amyu bawsang ni hte seng ai shawng lam bungli ni hpe bawngban jahkrup ai rapdaw re. Wunpawng amyusha ni hte seng ai lam ni hpe ra ahkyak ai hta hkan nna bawngban jahkrup sa wa na masing nga ai lam, Wunpawng Amysha Mungbawng Rapdaw Ningtau Amu Madu Sara Nhkum Tang Gun tsun dan ai.
Wunpawng Amyusha Mungbawng Rapdaw hpaw ninghtan ai masat ninghtoi hpe masat masa galaw ai hku nna akyu hpyi n-gun la ai lamang galaw ai re majaw, ginra shagu na dat kasa ni hte mungchying mungshawa yawng mung myit dum lawm let, Wunpawng amyusha Mungbawng Rapdaw a shawnglam bungli ni myit hkrum mang rum hte rau jawm galaw sa wa lu na matu akyu hpyi garum, n-gun jaw hpaji jaw la na hpe myit mada ai lam, Sara matut tsun lajin da ai re.
Photo Credit; WMR
