Namhpaka Sinpraw mare kata Wan Leng lam lai di na matu masing bai gran wa ai majaw mung mare masha ni myit tsang nga
Mungmyit Sinli Ga (Kachin Sub-state) KIA Masat Dap Dung (9) ginra, Namhpaka Sinpraw mare hte Nahpai mare kata hku nna Yangon kaw nna Miwa Gumsan Mungdan du hkra Wan Len lam galaw na matu masing bai gran wa ai majaw, mare dum n-ta htawt sit ra wa na hpe mung mare masha ni myit tsang nga ai lam na chye lu ai.
Myen Mung Asuya kaw nna Wan Leng lam shadawn masat ai hpe laiwa sai 2015-16 ning kaw nna galaw na matu hkyen lajang da ai re, masa amyu myu a majaw Wan Leng lam hpe n galaw byin ai raitim, 2025 ning hta ngut kre hkra galaw na matu masing jahkrat da ai sha n-ga, Wan Leng lam galaw na lam hpe kalang bai hkyen lajang wa ai majaw, mung mare masha ni myit tsang nga ai lam, Namhpaka Sinpraw Buga na Sara Hkangda Ja Di tsun dan ai.
“Mare kata hku Wan Leng lam galaw wa yang, pai hkra de mile 2 la na nga masha kaba ni hkan tsun ai, anhte a mare mung htawt wa ra na masing ni mung bai nga, Wan Leng lam galaw wa jang, anhte a yi sun hkau na, n-ta wang ni hkra wa na re majaw, mare masha ni grai myit ru wa ai, mare dum n-ta ni mung htawt ra wa na ngu grai myit ung-ang ai” nga nna tsun ai.
Wan Leng lam galaw na matu bai hkyen lajang wa ai majaw, Sun, wang, dum n-ta ni hkra wa yang, de a malai hkrat ang ai manu jahpu bai lu na matu, KIA Masat Dap Dung (9) ginra kata na Salang Kaba ni kaw nna mung mare masha ni hpe yi, sun, hkau na, dum n-ta wang sumla ni soi ya ai hte masat laika buk ni galaw ya ai re lam chye lu ai.
Wan Leng lam galaw wa yang, yi, sun wang hkau na dum n-ta ni hte Wan Leng lam ang ai mare buga ni mung machyi hkra wa mai ai sha n-ga, yi, sun hkau na galaw sha ai ni, rem lu rem sha, lai wa lai sa yak hkak wa mai ai re majaw, Wan Leng lam galaw ai hpe mung mare masha ni ninghkap nra sharawng ai lam, ndai Wan Leng lam gaw Mungmyit Sinli Ga nga ai Wunpawng amyusha ni nga ai mare law law hpe lai di nna galaw na re hpe mung chye lu ai.
