Wa Saradaw Kaba Paul Zinghtung Grawng a hkum tsawp moimang makoi mayang

Jinghpaw Mung Kahtawlik Nawku Hpung a hpung woi kaba Wa Saradaw Kaba Paul Zinghtung Grawng a hkum tsawp moimang makoi mayang akyu hpyi hpawng lamang (Missa) hpe October shata 27 ya jahpawt hkying 9:00am aten hta, Myitkyina Awng Nan Lawk, San Columban Cathedral Nawku Jawng kaw galaw nhtawm, Wa Saradaw a hkum tsawp moimang hpe Myitkyina E-din lawk, San Luka Chyum Jawng wang kaw lup makoi mayang sai lam na chye lu ai.

Wa Saradaw Kaba Paul Zinghtung Grawng hpe san da ai lup ding lu ra kaw n lup ai sha San Luka Chyum Jawng wang kaw lup makoi mayang ai lam gaw, “Kahtawlik nawku hpung a labau nnan rai nga ai Wa Saradaw a moimang re ngu myit hta bang da let yawng myit hkrum ai hte Edin chyum jawng wang lamu shara kaw lup ai re, yawn hkyen ten hta akyu hpyi n-gun sa la lu na matu, kabu pyaw ai ten hta shi hpe chyeju dum let makam masham lam, tinang a sak aprat hta, shagrit shanem let masha yawng hpe tsawra masha langai hku nna hkawm sa lu na matu” nga nna Manmaw Sasana kaw na Fr. Dr. Stephpen Nangzing Nawng Lat tsun dan ai.

Wa Saradaw Kaba gaw Jinghpaw Mung, Myen Mung sha n-ga, Mungkan ting hta shanu nga ai Jinghpaw Wunpawng amyusha ni yawng a chyeju madu re lam, Nawku hpung a chyeju madu re sha n-ga, Jinghpaw Wunpawng amyusha ni hpe tinang lagaw tinang chye tsap wa hkra ladat shaw ya let shawng nnan ningshawng tai ya ai re lam chye lu ai.

Wa Saradaw Kaba gaw Manmaw Sasana, Tingding Jau Ginwang, Gauri Lung Hkrat mare kaw nga lai wa ai, Tara Hkaw Sara Kaba Claude Zinghtung Byin Jawng hte Sara Kaba Jan. Annastasia Lazum Htu yan a kasha rai nna, Myitkyina Sasana hte Mandalay Sasana ni hta sagu rem magam gun hpai lai +wa sai re lam chye lu ai.

Wa Saradaw Kaba Paul Zinghtung Grawng asak (81) ning, Jau prat (55) ning, Saradaw prat (44) ning gaw October shata 24 ya shana hkying 12:08pm aten hta madu yesu hta yup pyaw bansa wa sai re.

Photo Credit; RVA Kachin