Tat sum kau ai Middleweight World Champion shingkyit hpe bai lu la hkra shakut sa wa na lam Nsang Awng La tsun da
October shata 30 ya shana Singapore Mungdan kaw galaw ai Middleweight World Champion shingkyit makawp poi hta, MMA ginsup ninghkring Nsang Awng La gaw Netalan Mungdan masha Reinier De Ridder hte shingjawng ai kaw Middleweight World Champion shingkyit tat sum kau ai re.
Ginsup poi lamang hta awngdang lam nlu ai raitim, Nsang Awng La hpe yu n-gun jaw nga ai mungshawa ni yawng hpe myit npyaw nbyin ai sha, Karai Kasang hte rau re majaw bai shakut yang awngdang na lam, Nsang Awng La shi a facebook laika man hta tsun da ai re.
Nsang Awng La gaw ndai ginsup poi hta sum ai raitim, shi hpe n-gun jaw nga ai mungshawa ni a matu kalang bai ginsup poi shang na matu jin jin re hte shaning garai nhtum shi yang ginsup poi bai shang mayu ai lam, BBC shiga dap kaw san htai galaw da ai kaw na chye lu ai.
Nsang Awng La gaw MMA Ginsup hpan hta mungkan madang hku nna, Middleweight hte Light Heavyweight Champion re hpe chye lu ai.
