Man Je Ninghtawn kata na lamu ga Eka 610 hpe Manmaw Ginwang Myen hpyen dap wang masat la hkrum

                                         Photo Credit; Zau Hkam

Manmaw Ginwang, Man Je Ninghtawn kata na mare masha htinggaw 15 a lamu ga hkauna Eka 610 hpe myen hpyen dap kaw nna hpyen dap wang ngu masat da sai re majaw myit hkrum ta masat htu na matu tsun shadut nga ai lam buga masha ni shana wa ai kaw nna chye lu ai.

Ndai lamu ga ni hpe gaw ja gumhpraw manu jahpu hte daw dan mari la ai nre sha hpyen dap gaiwang shatai na matu tinggyeng masat la ai lam re.

“Anhte gaw gara hku raitim nmai jaw ai. Ndai lamu ga kaw sha galaw sha nga ga ai re majaw kaga galaw sha na nnga sai. Asuya ni kaw nna ndai hku jam jau jaw ai gaw nmai na re. Prat tup galaw sha nga ai hkauna re, ndai lamu ga hpyen dap ni hpe jaw kau nna anhte hpa bai galaw sha nga na rai” nga nna hpyen dap wang masat la hkrum ai mungshawa langai tsun dan ai.

Hpyen dap wang masat la hkrum ai lamu ga shara ni gaw jiwoi jiwa prat kaw nna galaw sha nga ai lamu ga re hte sak se sak gan, lak mak hte madu da ai shara ni re lam, HK.L.Y 601 hpyen dap wang gaw 2001 ning hta she de hpang da ai re lam, matut tsun dan ai.

Man je Ninghtawn kata na Ga Ra Yang mare, Nam mahpoi mare hte Myitung kahtawng na mare masha htinggaw 15 a hkauna lamu ga ni rai nna, yawng pawng yang hpyen dap kaw nna masat la ai Eka 610 tup re.

Lai wa sai October shata nhtoi 26 ya shani hta Ga Ra Yang mare kaw dap jung nga ai Myen hpyen dap HK.L.Y 601 hte HK.L.Y 301 kata na hpyen du ni, seng ang ai ေထြအုပ္ salang ni gaw mungshawa htinggaw 15 hpe Man Je Ninghtawn rung kaw shaga la nna, mam dan la ngut jang tsep kawp nmai galaw sha sai lam, hpyen dap wang masat na re majaw myit hkrum ta masat lak mak htu ra na lam tsun lai wa sai re.

Dai hta mungshawa ni kaw nna, myit nhkrum ai re majaw ta masat lak mak hpe tsep kawp nhtu na matu tsun lai wa sai rai nna Hpyen dap kaw nna mung matsun hte maren nhkan sa ai sha hkauna hpe matut galaw ai rai yang  ျပည္ထဲေရး kaw nna ahkyak la sa wa na re lam dai zuphpawng hta tsun shalawm da ai re.

Hpyen dap kaw nna ndai lamu ga hpe tsep kawp nlu jaw ai nga nna tsun ai raitim mung mare masha ni kaw nna, myit hkrum ta masat lak mak hpe tsep kawp nlu htu ya ai lam tsun da ai.

Ya aten hta hpyen dap ni kaw nna, du wa na November shata hta galaw mat na rai nga ai ra lata poi a majaw kaga tsun shadut ai lam nnga shi ai raitim mung mare masha ni kaw nna, seng ang ai asuya hpang de laika bang tang madun na matu myit yaw shada nga ai re.

Shawng daw de mung 601 hpyen dap ni kaw nna, hpyen dap wang ngu masat zing la ai Eka law law nga lai wa sai re hpe mung matut chye lu ai.