COVID-19 ana byin ai aten ladaw grai galu wa ai majaw Nhkawng Pa mare masha ni malu masha grai yak hkak wa

COVID-19 ana zinli byin ai aten ladaw grai galu wa ai majaw, hkrun lam ni pat mat nna, dut lu dut sha tam lu tam sha grai yak hkak wa ai majaw, Manmaw Ginwang, Nhkawng Pa mare masha ni malu masha yak hkak nga ai re lam na chye lu ai.

Nhkawng Pa mare masha ni gaw yi sun hkau na hte kumba ban hpe madung kan bau bungli hku galaw sha ai raitim, COVID-19 ana zinli byin ai aten ladaw hta, ja gumhpraw yak hkak wa ai majaw, dut lu dut sha tam lu tam sha grai yak hkak wa ai sha n-ga, hkau hting hkau na nlu ai mare masha ni grau yak hkak wa ai re, ya na zawn yak hkak nga ai htinggaw ni hpe malu masha garum madi shadaw ya lu na matu buga hpung kaw nna seng ang ai Asuya hpang de garum hpyi da ai re lam, Nhkawng Pa buga hpung kata hkum ding num lit la woi nga ai Hpungtau Lahpai Zau Nan tsun dan ai.

“Buga kata kumba ban hpe madung kan bau bungli hku galaw sha ga ai raitim, manu grai yawm mat wa ai majaw n mai galaw sha na madang du mat wa ai hku re. Buga masha ni gaw nam hkan tu ai baw manyen hpun hpyi, nam pan zawn re amyu myu tam nna dut ginlen sha ai lam hte tinang dum nta kaw hkai da ai nbu, shau gaw hkai nmai ni hpe mung dut gin len la na matu grai yak mat sai re” nga nna tsun dan ai.

Nhkawng Pa mare masha ni malu masha grai yak hkak wa ai majaw, Nhkawng Pa buga hpung kaw nna yak hkak nga ai hpung htinggaw ni hpe n-gu, sau, jum, sabya ni garan jaw ai rai nna, buga ramma ni kaw nna mung Fund tam nhtawm, grai yak hkak ai hpung htingaw ni hpe November shata praw 6 ya shani malu masha garan jaw ai lam nga sai re.

Kaga garum ningtum wuhpung wuhpawng ni kaw nna mung, hpung lawk kata yak hkak ai dum nta masha ni hpe shang garum jaw ai lam nga ai raitim, COVID-19 aten ladaw grai galu wa ai majaw, malu masha grau yak hkak wa na hpe buga masha ni myit tsang nga ai re.

Photo Credit; Zau Doi Lahpai