Hpakant, Tawng Pyu mare Lockdown tara shang hpaw

Photo; Fb

Hpakant, Tawng Pyu mare Lockdown jahkrat da ai lam hpe November shata 13 ya shani kaw nna, tara shang hpaw sai lam chye lu ai.

Lockdown hpaw ai lam hte seng nna, Hpakant Amyu Sha Zinlum Hpung Amu Madu Salang Dashi Naw Lawn tsun ai hta “Ndai zawn hpaw ai lam gaw hkamja dap kaw nna, Tawng Pyu mare hta ana kap ai masha matut nmu ai majaw, Lockdown hpe tara shang hpaw ya ai lam re” nga nna tsun ai.

Ndai zawn Lockdown hpaw ya ai majaw, mare masha ni hkawm sa hkawm wa, galaw lu galaw sha wanglu wanglang mai hkawm sa sai nga nna salang wa matut tsun ai.

Hpakant hta Tawng Pyu mare gaw COVID-19 ana nnan mu jep ai rai nna, September shata 11 ya shani kawn, Lockdown jahkrat ai, shata lam rai wa ai majaw, October shata 27 ya shani mare masha ni Lockdown hpaw ya na matu, shawa n gun madun ai lam byin lai wa sai.

Tawng Pyu mare hta Lockdown hpaw ai lam gaw, hkamja dap kaw nna, hkam dahka nga ai majaw, hpaw ya ai re lam chye lu ai.

Lockdown jahkrat ai a marang e, galaw lu galaw sha, yak hkak wa ai majaw, Hpakant hta lagu lagut, rai gashun ai, damya mya, masha sat ai lam ni byin wa ai hpe chye lu ai.

Jinghpaw mung daw hta November shata 13 ya shani du hkra rai yang ana mu jep masha yawng 145 rai nna, tsi rung yu ai masha yawng 137 re lam chye lu ai.