Hpakant Kade mare kaw na nhkyi galun hkrum ai masha marai 3 tsi rung yu

Hpakant, Lawnghkang Rap, Kade mare Wan Sat Rung wang kaw November shata praw 1 ya shana nhkyi galun hkrum ai hta ningma grai sawng ai majaw, Myitkyina Tsi Rung hte Lawnghkang Tsi Rung kaw tsi tsi hkam la nga ai marai 4 kaw na marai 3 tsi rung yu sai lam na chye lu ai.

Shadang Di Ram gaw tsi rung shawng yu sai raitim, ningma bai sawng wa ai majaw ya aten Myitkyina tsi rung kaw tsi bai matut tsi hkam la nga ai lam, Shadang Maru Mun Awng Ja, Shadang Hpre Ram Sa hte Salang Marip Tu Mai ni gaw mai tsai sai majaw tsi rung yu nna dum nta kaw du nga sai lam, Kade mare ginra masha Sara Maran Tu Lum tsun dan ai kaw na chye lu ai.

Ndai mabyin manghkang gaw ra lata poi a matu COVID-19 ana jep chyoi ai gate ni yawng dawm da ai ten, November shata praw 1 ya shana hkying 9:00pm aten hta, Kade mare kaw nga ai lung seng lau ban U Kyaw Khine gaw Shadang Di Ram, Shadang Maru Mun Awng Ja, Shadang Hpre Ram Sa, Salang Marip Tu Mai hte Shadang Awng Myin Oo hpe nhkyi hte galun kau da ai rai nna, Shadang Awng Myin Oo gaw galun hkrum ai shana asak si sum mat sai lam chye lu ai.

COVID-19 aten ladaw hta, mare pru/shang gawnhkang ai hta woi awn ai wuhpung ni hte hkawm sa hkawm wa shawa masha ni a lapran tsun shaga, chye na hkawn hkrang hkat ai lam nnga ai hte nanghpam lu sha a majaw rai nna, ya aten nhkyi galun ai U Kyaw Khine hpe Hpakant Balik Rung ni kaw nna amu jep chyoi nga ding yang re lam chye lu ai.

Photo Credit; Fb