Sammung Wunpawng Hkringmang ra lata ai hta Duwa Tangbau Zuk Dau numdaw 3 lang ra lata hkrum
Laiwa sai November shata praw (8) ya shani Sammung Wunpawng Hkringmang shara a matu Hkringmang kasa marai 4 shanglawm ra lata hkam ai hta, Duwa Tangbau Zuk Dau (dinghkrai) gaw Sammung Wunpawng Hkringmang shara kaw numdaw 3 lang hku nna bai ra lata hkrum ai lam na chye lu ai.
Sammung Wunpawng Hkringmang shara kaw ra lata hkam ai ni kaw na, Shadang Doi Awng (UDP) Party gaw, ra lata ai kaw shanglawm ai lam nnga ai re, Tara kasa Brang Di (KNP), Salang Su La Nu (NLD), Salang Dabang Tu Lum (KNC) hte Duwa Zuk Dau (dinghkrai) ni shanglawm ra lata hkam ai hta, Duwa Zuk Dau (dinghkrai) gaw sindan pa law dik htum hte Sammung Wunpawng Hkringmang magam lit hpe bai matut gunhpai na matu, Munghpawm Myen Mung Ra Lata Ginjaw Comission Rung kaw nna ndau shana masat (260/2020) hte maren November shata 14 ya shani ndau da ai re.
Sammung Wunpawng Hkringmang shara kaw Duwa Zuk Dau gaw numdaw 3 lang hku nna bai ra lata hkrum ai hta, shadawn jit na hti hkum kade hte ra lata hkrum ai ngu ai hpe nchye lu ai raitim, Munghpawm Myen Mung Ra Lata Ginjaw Comission rung kaw nna Duwa Zuk Dau hpe Sammung Wunpawng Hkringmang magam lit bai matut gunhpai na matu tara shang ndau da sai hpe mu lu ai majaw grai kabu lawm sai raitim, amyusha shada nju ndawng nbyin na matu grai ahkyak ai nga nna Mungmyit Sinli ginra kaw na salang langai ya na zawn tsun dan ai.
“Lahta Sammung (Mungmyit Sinli Ga) nga ai Wunpawng amyusha ni nkau ni kaw nna Duwa Zuk Dau gaw asak kaba sai numdaw 2 lang rai sai ngu myit rawng mat ai hku re. Sammung Htunghking Ginjaw ni kaw nna mung Zuk Dau ra lata dang na matu galaw sa wa ai lam hta chye na hkawn hkrang nna bang ya ai group mi rai mat wa ai majaw, hkringmang a shara kaw kadai mi lu lu kabu lawm sai re. Shada kaw nhpru nmai nbyin na matu, mungshawa ni gaw tsi tsi la ra sai aten re ngu ai hpe mu mada ai” nga nna tsun ai.
Duwa Zuk Dau (dinghkrai) gaw Munghpawm Myen Mungdan a numdaw 3 lang ngu na ra lata poi hta, Sammung Wunpawng Hkringmang shara kaw ndai lang hte rai yang numdaw 3 lang hku bai ra lata hkrum sai majaw, Sammung Wunpawng Hkringmang magam lit hpe Duwa Zuk Dau kaw nna sha bai matut gunhpai sa wa na re lam na chye lu ai.
Photo Credit; Mungmyit Hpungtang Nsen
