Langai lang na jawngma kanu kawa, sara/num ni hkumra zuphpawng hte ningtawn jawngma kumhpa shagrau hpawng galaw
Laiza Lahta Tsang Jawng Rawt Ninghkawng Gawknu kaw November shata 17 ya shani, 2020-2021 ning hpaji ladaw a langai lang na jawngma kanu kawa, sara/num ni hkumra zuphpawng hte ningtawn jawngma kumhpa shagrau lamang hpe jahpawt hkying 9:00am aten kaw nna hkying 12:30pm aten du hkra galaw la lu sai re.
Zuphpawng hta Laiza Muklum jawng Komiti Ningtau Ningbaw Saranum kaba Nhkum Hkawn Ra kaw nna hpawng hpaw mungga hpe tsun ya nhtawm Laiza Muklum Hpaji Du Saranum kaba Lagang Ja Bu kaw nna hpaji jaw mungga hpe shaga ya sai re.
Ndai zuphpawng hpe shaning shagu laning mi hta lahkawng lang galaw ai rai nna, jawngma kanu kawa ni, sara/num ni hte jawngma ni a hkrumzup bawngban ai zuphpawng lamang re hte ningtawn ai jawngma ni hpe kumhpa shagrau ai lamang ni mung lawm ai re lam, Laiza lahta tsang jawng up saranum Singneng Ja Mai tsun dan ai.
Hkumra zuphpawng hpe nhtoi 2 ya galaw na matu masat da ai re. November shata 17 ya shani hta lawu tsang daw na jawngma ni hpe shagrau ai lam rai nna, 18 ya shani hta gaw lapran tsang daw hte lahta tsang jawngma ni a kumhpa shagrau ai hpawng hpe galaw sa wa na re.
Laiza lahta tsang jawng hta daining 2020-2021 ning hpaji ladaw hta jawngma yawng 1109 tup sharin hkaja nga ai re hte hpaji sharin sara ni yawng marai 74 tup re.
Zuphpawng hta jawngma, kanu kawa hte sara/num ni yawng marai 170 daram sa du shang lawm ai hte COVID-19 ninghkap tara ni hpe tup hkrak hkan nang hkan sa let galaw ai re hpe chye lu ai.
