Myitkyina Saradaw Ginwang kata na Wa Jau ni Quarantine hkam la nga

Myitkyina Saradaw Ginwang kata na Wa Jau ni marai 20 jan gaw Myitkyina St. Columban Nawku Jawng kaba kaw November shata 18 ya shani kaw nna Quarantine hkam la nga ai lam na chye lu ai.

Philippines Mungdan kaw na wa ai COVID-19 ana positive mahtai pru ai masha hte hkrum shaga ai Wa Jau hpe COVID-19 ana jep chyoi yu ai hta, ana negative mahtai pru ai raitim, Wa Jau shi hte hkrum shaga ai Jau ni yawng Quarantine hkam la nga ai re.

Shawng nnan lang ana jep chyoi yu ai hta ana kumla nmu ai raitim, numdaw 2 lang bai jep yu ai shaloi negative mahtai bai pru ai rai yang, Quarantine hkam la nga ai Jau ni yawng nta de mai wa sai lam, Myitkyina Jau Ginwang na Wa Jau Peter Hka Awng Tu tsun ai.

“COVID-19 positive masha hte hkrum shaga ai 10 ya jan na mat sai, shi hpe bai san jep yu yang ana negative mahtai pru ai. 2, 3 ya na yang yawng hpe kalang bai jep yu nna ana nmu jang Quarantine hkam la nga ai Wa Jau ni yawng bai wa lu na re” nga nna tsun ai.

Kahtawlik nawku hpung kaw na COVID-19 ana makawp maga komiti ni kaw nna Quarantine hkam la nga ai Jau ni a matu malu masha hte ra mara yawng lit la galaw ya nga ai lam chye lu ai.

COVID-19 ana hpe majoi nhkrit ai sha sadi maja ra ai lam, hkawm sa let Mask shakap, lata kashin nna, tinang a magam bungli hpe atsawm hkrak galaw nhtawm, hkamja dap kaw na matsun ai hpe atsawm hkan nang galaw sa yang COVID-19 ana kaw na lawt lu na re nga nna Wa Jau matut tsun n-gun jaw da ai re.

Photo Credit; RVA Lisu