Danai ginra kaw Ka-ni yi hkyen jasan ai lam bai galaw na

Myen Asuya Balik Dap ni kaw nna, Danai ginra hta hkai shatut tawn ai Ka-ni yi Eka (40) jan hpe du wa na January shata laman hkyen jasan ai lam galaw na matu hkyen lajang nga ai lam na chye lu ai.

Ka-ni yi hkyen jasan sa wa na lam hte seng nna Danai ginra Ka-ni Nanghpam Pat Jasan Hpung ni hte tsun jahkrup ai lam nnga ai re lam, Danai Ginra Ka-ni Nanghpam Pat Jasan Ningbaw Sara Nhpang Naw Tawng tsun ai.

“Asuya Balik Dap kaw nna galaw na hku hkyen ai nga gaw tsun wa ma ai. Raitim mung anhte mungshawa ni hpe jahkrup ai lam nnga ai. Danai ginra na Ka-ni yi kade ram nga ai ngu ai hpe ntsa lam tang madun ai lam sha galaw ai. Asuya Balik Dap kaw nna tsun jahkrup ai lam nnga ai majaw, Danai Ginra Pat Jasan Hpung ni kaw nna shanglawm na lam nnga shi ai re” nga nna tsun dan ai.

Ka-ni yi hkyen jasan ai lam hta, gara shara kaw ka-ni yi kade daram nga ai ngu ai hpe atsawm sawk sagawn nna, tara rap ra ai hte tang du hkra hkyen jasan kau ya nhtawm, mungmare masha ni a matu Ka-ni a malai kaga kanbau bungli ni hpe Asuya kaw nna htep lahti galaw ya ai rai yang grau kaja na re lam, ginra masha ni tsun ai kaw na chye lu ai.

“Ka-ni yi hkyen jasan ai lam hpe bungli galaw dan, hkrang shala dan ai hku nre sha, mungshawa ni hpe atsawm chye na hkawnhkrang hkra, ningmu jahpaw tsun dan nhtawm, Asuya kaw nna lit la ra ai daw hpe garum madi shadaw, lam masam ya yang she tang du na re” nga nna sara matut tsun dan ai.

2019 ning hta Danai Kawng Ra mare Pat Jasan Hpung ni, Wara Zup buga Pat Jasan ni hte mare uphkang salang ni pawng nna, mare hte ni kahtep ai shara kaw na Ka-ni yi ni hpe hkyen jasan ai lam galaw lai wa sai re lam na chye lu ai.

Myen Asuya Balik Dap ni kaw nna, Ka-ni yi hkyen jasan ai lam hpe Danai ginra sha n-ga, Ka-ni hkai shatut ai kaga ginra ni hta mung galaw na matu hkyen lajang nga ai lam na chye lu ai.