Hpakant ginra kaw lawu ga na lagu shang ai masha law wa ai majaw COVID-19 ana positive byin ai masha bai jat wa

Hpakant ginra kaw lung seng company ni bungli shang na aten bai du wa sai majaw, lawu ga na lagu shang ai masha bai law wa ai sha n-ga, mare pru/shang shagyit (Gate) ni hpe atsawm nlu pat ai majaw, November shata laman COVID-19 ana positive byin ai masha marai 10 jan bai jat wa ai lam na chye lu ai.

“Anhte kaw gaw Mandalay lawu de na lagu shang ai masha grai law ai, pru shang atsawm nlu pat ai majaw rai nga ai, lung wa ai masha ni yawng hpe Quarantine center de sa ai raitim, nkau ni gaw lagu shang ai majaw ya na zawn byin wa ai lam re.

Pru/shang sha atsawm nlu jen jep yang gaw, Mawga na company ni hpaw na matu yak wa na masa nga ai. Company ni gaw bungli hpang wa mayu, ana mung grau bai sawng wa, yawng myit ung-ang nga ai re” nga nna Hpakant ginra masha rai nga ai Salang Dashi Naw Lawn tsun ai.

Hpakant ginra kaw November shata 25 ya shani hta mung COVID-19 ana positive byin ai masha marai 4 bai jep mu lu ai re. COVID-19 ana kap ai masha lani hte lani grau grau bai law jat wa ai majaw, ginra Asuya ni kawn November shata 25 ya shani kaw nna Muklum kata Mask garan jaw ai lam, shinggan pru shagu Mask shakap ra na lam hpaji jaw tsun ndau ai lam bai galaw nga sai re hpe chye lu ai.

Hpakant ginra hta Lunghkang mare hte Seng Tawng mare gaw COVID-19 ana kap bra ai law dik htum mare rai nna, Hpakant de shang wa ai masha ni hpe Quarantine tawn nna  COVID-19 ana ding yang jep chyoi ya nga ai raitim, lawu mung na lagu shang ai masha ni hpe pru/shang lam atsawm nlu pat ai majaw, ana grau kap bra sawng wa na hpe ginra masha ni myit tsang nga ai sha n-ga, ana zinli a majaw galaw lu galaw sha mung, yak hkak dut dang nga ai lam na chye lu ai.

Ya aten Jinghpaw Mung kata COVID-19 ana positive masha marai 180, tsi rung yu ai masha yawng marai 149, tsi tsi hkam la nga ai masha marai 31 re lam chye lu ai.

November shata 25 ya shana hkying 8:00pm aten du hkra rai yang, Myen Mung hta COVID-19 positive ana nnan jep mu ai machyi masha yawng marai 1330, tsi rung yu ai masha marai 1070 rai nna asak si sum ai masha marai 26 re lam chye lu ai.

Myen Mung ting hta COVID-19 ana jep mu lu ai machyi masha jahpan yawng marai 83566, tsi rung yu ai masha yawng marai 63366, asak si sum ai masha marai 1810 nga sai lam, Hkamja Lam hte Ginsup Hkringmang Dap kaw nna ndau da ai re.

Photo Credit; IPRD Hpakant