Hpung pati shang na jawngma ni hpe Wunpawng Mungdan Shanglawt Hpung a gaw da ai tara hkaja hpawng galaw
Wunpawng Mungdan Shanglawt Hpung (KIO) pati shang na myit hkawn ai Alen Bum IDPs Lahta Tsang Jawng kaw jawng lung hpaji sharin hkam la nga ai tsang 9, 10 jawngma ni marai 98 hpe November shata 26 ya shani kaw nna 28 ya du hkra, KIO hpung pati a gaw da ai tara hpe woi hkaja ai re lam chye lu ai.
“Jawngma ni nan myit lawm nna KIO hpung pati shang na yaw shada lam nga ai hte jawng sara/num ni hpe mying jahpan jaw wa ai majaw, hpung pati kaw hkrup mara shang ai hku nre sha, hpung a gaw da ai tara lam atsawm chye na hkawn hkrang ai shaloi she hpung shang na matu yaw shada let, 3 ya tup gaw da ai tara woi hkaja nna, jawngma marai 98 hpe pati shang na matu hkyen lajang da ai re” nga nna Alen Bum IDPs Hpaji Jawng Up Sara Kaba Tangbau Hkawng Lum tsun ai.
Hpawng hta Ginjaw Ginra Ginwang Ginjaw Pati Komiti Amu Madu Du Kaba Labawng Gam Rip kaw nna madung lit la woi awn sharin ya ai re.
Ninggawn Daju Komiti Amu Madu Du Kaba Yajawng Dai Hkawng, Saranum Majap Seng Hkawn hte Jan. Hpunggan Seng Tawng ni kaw nna mungmasa mahkawn ni hpe sharin ya ai re lam chye lu ai.
Ndai hpawng lamang gaw hpung pati shang na matu mying jahpan bang da ai jawngma ni hpe madung woi hkaja ai re hte KIO hpung pati hpe madi shadaw nna kaja wa nan myit lawm ai asak (18) ning lahta na jawngma ni hpe shawng nnan hpung pati a lam woi hkaja ai re hpe mung chye lu ai.
