Shadang Zahkung Seng Li hpe kahtam kau da ai ramma marai 2 hpe lu rim

Mungmyit Sinli Ga (Kachin Sub-state) Kutkai Ginwang, Namrim mare kaw na Shadang Zahkung Seng Li hpe kahtam kau da ai ramma marai 3 kaw na cycle gawt ai wa hte kahtam ai ramma marai 2 hpe November shata 29 ya shani Kutkai Balik Dap ni lu rim da sai rai nna, tara upadi nga ai hte maren ahkyak la sa wa na re lam na chye lu ai.

Laiwa sai November shata 28 ya shani hta, Namrim mare na Shadang Zahkung Seng Li hpe cycle langai hta marai 3 pawng jawn ai la kasha marai 3 gaw nhtu hte dukrung kaw kahtam kau da ai sha n-ga, Kutkai lawk (8) kaw shanu nga ai Mg. Nyi Nyi Swe asak (19) ning hpe mung, ramma marai 2 nhtu hte kahtam kau da nna hprawng yen mat ai re lam, Kutkai ginra masha ni tsun ai kaw na chye lu ai.

Ya aten Mg. Nyi Nyi Swe gaw ningma sawng ai majaw, Lashu tsi rung kaw tsi tsi hkam la nga ai rai nna, asak si sum mat sai shadang Seng Li a moimang hpe November shata 29 ya shani Kutkai lungding lup wa kaw makoi mayang kau sai lam na chye lu ai.

Shadang Zahkung Seng Li hpe kahtam kau da ai ramma marai 2 gaw Kutkai mare na rai nna, Miwa amyusha re lam, hprawng yen mat ai ramma langai hte Mg. Nyi Nyi Swe hpe kahtam kau da ai ramma marai 2 hpe mung, Balik Dap ni kaw nna jep sagawn nga ding yang re lam chye lu ai.

Photo Credit; Internet