Lai wa lai sa mungshawa ni hpe Myen hpyen dap ni, laja lana san jep nga
Mungmyit Sinli Ga (Kachin-Sub-State), Mungji Ginwang, Manje mare kata kaw shagyit (Gate) jahkrat nga ai, Myen Hpyen Dap, Dapnu 99 kata na hpyen n gun 50 daram nga ai Hk.M.Y 109 na hpyen hpung ni gaw, lai wa lai sa mungshawa ni hpe laja lana san jep nga ai lam, buga masha ni shana wa ai kaw na chye lu ai.
“Mare kata kaw nan shagyit jahkrat nna lai wa lai sa mungmare masha ni hpe san jep ai lam, mungchying masat jep ai lam, mying ka la nhtawm, ta masat lakmat htu ai lam ni hpe galaw shangun ma ai” nga nna buga masha langai tsun dan ai.
Mare kata shagyit jahkrat nna san jep ai lam hpe November shata kaw nna hpang wa ai re hte mare masha ni gun lang ai arung arai ni, dum hpau sinat zawn re ni hpe mung zing la kau ya ai lam nga ai re.
Ya aten gaw nsi naisi shu la mu la ai aten re majaw, hpyen dap ni kaw nna, mare kata nga ai mungshawa ni lai wa lai sa ni hpe san jep ai lam jahkring hkring galaw ai majaw, mungmare masha ni a matu, hkawm sa hkawm wa dutdang hkrit tsang nga ai lam chye lu ai.
Shagyit jahkrat nga ai Myen hpyen dap ni kawn shana hkying 6:00pm aten du ai hte lam pat kau sai rai nna, mare kata kaw nga ai mungmasha ni hpe raitim, ntsen nhten na zawn raijang, laja lana san jep ai lam ni galaw nga ai re.
Mungmare masha ni hpe san jep ai hta ya aten du hkra rai yang jahkrit shama ai lam gaw nnga shi ai raitim, aten ladaw na wa jang jahkrit shama ai lam, shagyip shagyeng ai lam ni nga wa na masa nga ai lam, buga masha ni tsun dan ai kaw na chye lu ai.
