Shadan Pa lamu ga hte seng nna Myen shiga dap de tang madun na matu hkyen lajang nga
Myen Mung a ေျမလြတ္၊ ေျမလပ္နွင့္ေျမရိုင္းဥပေဒ hte Asuya kaw U Naing Win hpung ni shawk shawn la kau ai Shadan Pa mare masha ni a lamu ga manghkang hte seng nna, Asuya kaw nna bai htang shana wa ai lam nnga ai majaw, Shapan Pa mare masha ni kaw nna Myen shiga dap The 74 Media de adan aleng shiga tang madun na matu hkyen lajang nga ai lam na chye lu ai.
Asuya kaw nna October shata hta Shadan Pa mare de lamu ga wa shadawn jep chyoi ai lam galaw ai raitim, ya aten du hkra hpa htang shana wa ai lam nnga ai sha, aten shana taw nga ai majaw, Shadan Pa mare masha ni myit ru myit tsanghkrum nga ai sha n-ga, ndai lamu ga hte seng nna lawan hparan ya na hpe ra sharawng nga ai lam chye lu ai.
“74 Media shiga dap de mung shiga hku nna bang na ngu tsun da ai, anhte hpe galoi mung garum taw nga ai shingnip ngu ai tara kasa ni hte ta gindun nna Asuya kaw lamu ga sawk da ai wa hpe tara shang shaprai ya na matu hkyen lajang nga ai lam” Shadan Pa mare masha Salang Myu Tsaw Bawk tsun ai.
Shadan Pa mare masha ni mung lawan yu wa nna wa nga ra na masa nga ai, lawu ga de na masha chyasam ni grai jat wa ai majaw, lamu ga manghkang ni grau jat wa na masa nga ai majaw, Shadan Pa mare masha ni mung, tinang lamu hpe masat masa wa galaw madu da ra na re ngu mu mada ai lam, salang wa matut tsun dan ai.
2011 ning hta Myen Hpyen Dap hte KIA ni majan byin wa ai majaw, Shadan Pa mare masha ni hpyen koi yen taw nga ai ten hta, Myitkyina, Jan Mai Kawng kaw nga ai U Naing Win hte rau marai 8 hpung ni gaw Shadan Pa mare masha ni a galaw lu galaw sha ai lamu ga Eka 400 hpe marai langai mi hta Eka 50 hpra, Myen Mung Asuya a ေျမလြတ္၊ ေျမလပ္နွင့္ေျမရိုင္းဥပေဒ hte Myen Asuya hpang de shawk shawn la ai re lam chye lu ai.
Shadan Pa mare gaw Shanglawt Asuya hku nna Laiza Ginwang, Na Lung Ninghtawn kata na mare rai nna, Myen Asuya hku rai yang Nmawk Myo Ne, Daw Hpum Yang Myo, Manmau mare kata na mare re lam, ndai lamu ga gaw ေျမလြတ္၊ ေျမလပ္နွင့္ေျမရိုင္း nre ai sha, Shadan Pa mare masha ni galaw lu galaw sha ai lamu ga re lam chye lu ai.
