Shadang Zahkung Seng Li hpe kahtam sat kau da ai marai 3 kaw na Shadang Zau Ja hprawng koi yen nga
Shadang Zahkung Seng Li hpe kahtam sat kau da ai masha marai 3 kaw na Shadang Zau Ja gaw ya aten naw hprawng koi yen nga ai rai nna, Kutkai Balik Dap kaw nna mung, jep sagawn nga ding yang re lam na chye lu ai.
Shadang Zahkung Seng Li hpe kahtam sat kau da ai ni gaw, Kutkai lawk 3 kaw na Mg. Aung Than Zin (sh) Li Yin Shu asak (19) ning hte Mg. Ah Chan asak (17) ning rai nna, Namparung mare, Mungne buga hte Kukai daw 4 kaw na Shadang Zau Ja asak (20) ning re lam chye lu ai.
Myen ramma ni hte Miwa ramma ni ga law hkat ai majaw, shadang Seng Li hpe kahtam kau da ai masha marai 3 gaw nhtu hpai nna, shanhte hte ga law hkat ai Myen kasha ni hpe hkan tam nga ai ten, shadang Seng Li gaw cycle lawan ladan jawn lai wa ang ai majaw, shadang Seng Li gaw shanhte hpe jahte tam agya shala galaw ai re ngu nna kahtam kau da ai re lam, Kutkai Balik Du ni tsun ai hpe Namrim mare na Sara Shekoi Dau Ze tsun dan ai.
Asuya Magam Dap hkum hkra nga ai Muklum mare kaba hta masha sat manghkang ni jahkring hkring byin ai lam gaw, mung shawa ni a matu shim lum lam nnga ai ngu hkam sha ai re, htawm hpang de ya na zawn mabyin manghkang ni n byin hkra, lit nga ai salang ni kaw nna tang du hkra akyak la nhtawm, shim lum lam jaw, makawp maga ya na hpe ginra masha ni ra sharawng nga ai lam, Sara matut tsun ai.
Ndai mabyin gaw laiwa sai shata laman hta, Mungmyit Sinli Ga (Kachin Sub-state), Kutkai Galile daw (8) makau Modo lam kaw November shata 28 ya shana daw hkying 2:20pm aten daram hta, Namrim mare kaw na Shadang Seng Li hpe cycle langai hta rau pawng jawn ai Mg. Aung Than Zin, Mg. Ah Chan hte Shadang Zau Ja ni kaw nna, hpa mara nnga ai sha wa kahtam kau da nna hprawng yen mat ai re.
Ya aten tara tawt lai ai marai 3 kaw na Mg. Aung Than Zin hte Mg. Ah Chan hpe lu rim da sai raitim, Shadang Zau Ja gaw naw hprawng koi yen nga ai majaw, Shadang Zau Ja hpe lu rim ai shaloi she, ndai amu manghkang hpe hparan sa wa na re lam chye lu ai.
Photo Credit; Fb
