Hpun Lum Yang hpyen yen lapran tsang jawngma ni ka/soi da ai hkrang pan madun gawk hpaw lamang galaw

Irrawaddy Organization ni woi awn nhtawm, jawngma ni ka/soi da ai hkrang pan madun gawk hpaw lamang hpe December shata 18 ya shani hkying 11:00am aten hta Hpun Lum Yang hpyen yen lapran tsang jawng kaw galaw la lu sai re.

Lamang galaw ai yaw shada lam gaw, “anhte a Ma ni tinang soi shapraw tawn ai lata maka hpe kalang bai yu la nna Ma ni a myit masin atsam ningja rawt jat wa hkra, tinang galaw da lu ai lam hpe bai yu la let, shawng lam hta Ma ni grau nna hkrang Pan hpe myit lawm wa hkra hte tinang a tatut bungli zawn chye galaw wa hkra ngu yaw shada let galaw ai lam re” nga nna Jawng Sara Komiti Amu Madu, sharin saranum Maji Roi Tawng tsun ai.

Tsang 2 kaw na tsang 8 du hkra na hkrang pan soi myit lawm ai jawngma ni hpe lata la nna woi galaw ai re hte dai ni madun ai hkrang pan gaw hpyen yen tsin yam hkrum nga ai Ma ni a kraw kata na hkam sha lam hpe soi da ai hkrang pan re lam chye lu ai.

Ndai hkrang pan soi ai lam hpe laiwa sai 2015 ning kaw nna myit lawm ai jawngma 50 hte soi hpang ai rai nna, daining 2020 ning hta gaw myit lawm ai jawngma 115 hte soi nga ai re lam chye lu ai.

Hkrang pan soi ai lam hta, Irrawaddy Organization ni kaw nna Laiza grup yin kaw na hpaji jawng ni hta, project langai hku shang lawm garum madi shadaw nga ai lam chye lu ai.

Jawng kata hta hkrang pan ningtawn ai jawngma ni hpe lata la nna Myikyina, Yangon hkrang pan madun gawk de woi sa ai lam galaw re sha n-ga, jawng gawk kata masat ninghtoi ni hta hkrang pan shingjawng lamang ni galaw ai re lam chye lu ai.

Ya aten Hpun Lum Yang hpyen yen lapran tsang jawng hta, jawng sara/num ni marai 55 hte jawngma yawng marai 777 laika hpaji sharin hkam la nga ai lam chye lu ai.