Tinang mare buga de bai nhtang wa lu na matu wa gan hkring sa na ginsum gawgap nga

Waimaw, Kanpaiti lam ntsa na hpyen yen mare ni hte Dabu bum masat (6) kaw shanu shingbyi nga ai hpyen yen ni tinang mare buga de bai nhtang wa na matu, dum nta garai nlu shi ai laman wa gan hkring sa na ginsum gawgap ai lam hpe lai wa sai bat kaw nna galaw hpang nga sai lam na chye lu ai.

Ya na zawn gan hkringsa na ginsum gawgap wa ai lam gaw, Dabu bum Masat (6) kaw shanu shingbyi nga ai hpyen yen camp ni grai yak hkak jam jau wa ai majaw, ya gawgap nga ai ginsum ni kaw wa gan hkringsa nhtawm, dum nta gawgap ngut ai hpang htawt sit lu na matu hkyen lajang nga ai re lam, Lahpai Buga Hpung Amu Madu Sara Masa Zau Ring tsun dan ai.

Mare buga de bai nhtang wa na htingaw ni gaw, Waimaw Ginwang ni hku nna tang madun da ai htinggaw 400 jan nga rai nna, ya na zawn hpyen koi yen ai mare ni tinang mare buga de bai nhtang wa ai lam hta, yawng sa du n-gun jaw jawm garum la na hpe myit mada ai lam, KBC Garum Kahtau hte Bawngring Sasana Magam Dap Hpa-awn Sara Hpauyam Hka Li tsun ai.

Tinang mare buga de bai nhtang wa na matu hkyen lajang nga ai Sadung Ginwang kata na hpyen koi yen nga ai mare ni gaw, Lamyang, Lajawng, Lu Myang, Gaw Nan, Lu Gyi, Lahpai hte Mangshang mare kaw na htinggaw yawng 840 re lam, Waimaw Ginwang IDPs Lanawn Lakawn Komiti kaw na chye lu ai.

Photo Credit; Hpauyam Hka Li