Ninggawn Daju Komiti kaw nna Gaw Ningja ni hpe sa du gawan zinlum ai lamang galaw

Wunpawng Mungdan Shanglawt Hpung, Ninggawn Daju Komiti kaw nna December shata 24 ya shani, Sut Mung Awng Gaw Ningja Dabang, Je Yang Hpyen Yen Dabang, Dai Lawn Rung Hpyen Tsi Rung hte Masat (5) Dap Ba Hpyen Rung kaw myu hte Mungdan a matu hkum hkrang daw chyen mi apnawng mat wa sai Gaw Ningja (lagaw lata daw hten) ai ni hpe sa du gawan zinlum ai lamang galaw ai re.

Lamang hta makam masham hpung woi sara ni hte Ninggawn Daju Komiti Dinggrin salang ni kaw nna, Gaw Ningja ni hte dum nta masha ni yawng a matu, akyu hpyi ya ai hte n-gun jaw mungga shaga ai rai nna, Hkristmas kumhpa jaw ai lam galaw ai re.

Laiwa sai 2011 ning majan kalang bai hpaw hpang wa ai ten, myu hte mungdan a matu hkum hkrang daw chyen mi apnawng mat wa ai Gaw Ningja ni hpe sa du gawan n-gun jaw ai lam rai nna, ya na zawn sa du gawan n-gun jaw ai lam gaw, grai kaja dik ai lam langai re. Gaw Ningja ni mung, myit kaji garen ai lam nbyin na matu hte seng ang ai kaw nna lit jaw da hkrum ai komiti ni hku nna, kaga ten ni hta mung ra wa ai hta hkan nna, sa du gawan ai lam galaw yang kaja ai re nga nna Ginjaw Ninggawn Daju Komiti Dinggrin Salang Udi Awng tsun ai.

Ningawn Daju Komiti Dinggrin Salang ni kaw nna wuhpung 2 garan nhtawm, Sut Mung Awng Gaw Ningja Dabang kaw na marai 15, Je Yang Hpyen yen dabang kaw na marai 9, Dai Lawn Rung Hpyen Tsi Rung kaw na marai 15, Masat (5) Dap Ba Hpyen Rung kaw na marai 5 hte Laiza Muklum kata na Gaw Ningja htinggaw 12 hpe sa du gawan n-gun jaw ai lam galaw la lu sai rai nna, sumtsaw sumtsan hta du nga ai Gaw Ningja ni marai 13 a matu mung, myit dum akyu hpyi ya ai lam galaw ai re hpe chye lu ai.