Gaw Ningja Dabang nnan gawgap na matu htingra wan nat jasan jaseng lam galaw
Myu hte Mungdan a matu tinang a hkum daw chyen mi apnawng mat wa sai Gaw Ningja (lagaw lata daw hten) ai ni shanu shingbyi na dabang nnan gawgap sa wa na matu, Sut Mung Awng mare kaw December shata 14 ya shani hkyen jasan da ai htingra ni hpe December shata 26 ya shani wan nat jasan jaseng ai lam galaw la lu sai re.
Jasan jaseng bungli galaw ai hta, Ninggawn Daju Komiti kata na Dai Lawn Rung dabang komiti magam gun ni marai 22, Ginjaw Rung Pati Komiti magam gun ni marai 9 hte Laiza Ginwang Pati Komiti kata na magam gun ni marai 9 shang lawm ai lam chye lu ai.
Laiwa sai December shata 17 ya shani hta, KIC Ningbaw Malai Du Kaba Sumlut Gun Maw hte rau, Ginjaw Komiti Ninggawn Amu Madu Sara Kaba Kumhtat Hting Nan hte Ginjaw Komiti Salang ni Sut Mung Awng Gaw Ningja Dabang de sa du gawan ai lam galaw ai rai nna, Gaw Ningja Dabang nnan gawgap na matu hte Gaw Ningja ni hpe yu lakawn na matu tsi jaw gawk, hpaji jawng ni hpe gawgap sa wa na matu yaw sing da ai re hpe chye lu ai.
Gaw Ningja Dabang gawgap sa wa na matu hkyen lajang ai lam hta, myit hta hkam sha let grai myit lawm ai hte shanglawm galaw nga ai rai nna, myu hte Mungdan Shanglawt lu na lam hta, lam amyu myu hku nna tingnang a hkum hkrang daw chyen mi apnawng mat wa sai myitrum manaw manang ni a matu, Gaw Ningja dabang gawgap ya na lam hpe ntsa tsang salang ni kaw nna, myit lawm hkum lawm lajang hparan ya ai hpe chye lu ai majaw, myitrum manang ni mung, dabang kaw a ngwi apyaw hte wa nga na hpe ra sharawng ai lam, Ninggawn Daju Komiti Ningtau Amu Madu, Du Up Maji Zau Ring tsun dan ai.
Dabang gawgap na shara jasan jaseng ngut ai hte, htingra ni htu shara nhtawm, gawgap bungli hpe lawan dik ai hku galaw hpang sa wa na re lam chye lu ai.
Ya gawgap sa wa na Gaw Ningja dabang hta gaw, kun dinghku hte nre ai sha, tinang dinghkrai rai nna gawn lajang na nta masha nnga ai Gaw Ningja ni hpe gawn lajang na tsi sara san da nhtawm, dai dabang hta tsi tsi gawn lajang sa wa na re lam chye lu ai.
