Sam amyusha Hpungkyi ni sa kashun kum maden la ai Nati buga hkalup sasana wang lamu ga hpe lahkawng maga maren garan ya

Sammung Ginwang, Sinli Ninghtawn, Nati mare kaw na Sam amyusha Hpungkyi ni sa kashun kum maden la kau ai Nati buga hkalup sasana wang lamu ga hpe December shata 18 ya shani Lashu Ginwang uphkang salang ni kaw nna lahkawng maga hpe pe 15 hpra garan kau ya sai lam, buga masha ni shana wa ai kaw na chye lu ai.

Ndai lamu ga gaw Nati buga hpung masha ni kaw nna shawng ningnan hkyen shatsawm htu shara nhtawm, laiwa sai 1948-49 ning hta, Saranum Kaba Labang Roi Ji kaw nna Nati Hkalup Hpung ni a sasana laili laika sharin jawng hpaw sharin lai wa ai shara rai nna, ndai lamu ga hpe laiwa sai 2019 ning April shata 18 ya shana aten, Sam Hpungkyi ni woi awn nna shanhte a bukda makam dawnghkawn hpe sa jun masat ai hte sa kashun kum maden la kau ai lam chye lu ai.

“Lapran kaw pe 8 lam hpaw kau nna, ngam ai hpe lahkawng maga maren garan kau ya ai re. Myo Ne salang ni gaw rap ra ai hku nsa ai re, Jinghpaw Wunpawng ni a matu nmyit ya ai sha, lamu ga hpe Sam amyusha Bukda ni hpe yawng jaw kau na matu tsun ai. Sam ni tang madun ai hpe sha lit la ai hku rai nna, anhte Jinghpaw ni tang madun ai hpe gaw ahkyak nla ya ai hku rai nga ai. Myo Ne kaw na nlu hparan ai majaw, Lashu Ginwang de bai tang madun nhtawm, ya na zawn hparan ya ai re.

Anhte a sasana lamu ga wang hpe garan ai re majaw, myit dik lam nnga ai hku re. Laiwa sai kaji kawa ni woi awn wa ai ten hta, lamu ga lakmat ni hte atsawm nlu gawgap da ai re majaw, anhte Ma ni a lakhtak hta nlu hkye kau dat ai lam ni law law nga ai re, tau hkyen lajang ai lam gawngkya ai re ngu hkap la ai re” nga nna Nati Buga Hpung Amu Madu Sara Loi Wawm Brang tsun ai.

Mare uphkang salang ni hte Myo Ne salang ni gaw, sasana lamu ga hpe shawa shara hku nna ga baw amyu myu shaw let, zing la na matu hkyen lajang wa ai hpe buga hpung masha ni nlu hkap la ai majaw, Sammung Wunpawng Hkringmang Salang Duwa Zukdau, Sammung Htunghking Hpung ni hte Buga hpung ni hku nna bai jawm tsun shaga ai majaw, sasana lamu ga wang hpe lahkawng maga n machyi hkra jawm myit hkrum dawdan ai hte Ginwang kaw nna maren garan ya ai re lam chye lu ai.

Ya lu garan la ai lamu ga hta, nawku hpung rung hte ginra hall gawgap na matu hkyen lajang nga ai rai nna, Nati mare kaw hkalup hpung htinggaw 40 daram nga ai lam chye lu ai.

Photo Credit; Loi Wawm Brang