Laksan Laiza Muklum amyu shayi atsam sharawt tingse dum wunkat yu lamang galaw
Laksan Laiza Muklum Amyu Shayi Komiti ni woi awn nna, laksan Laiza Muklum amyu shayi atsam sharawt tingse dum wunkat yu lamang hpe December shata 30 ya jahpawt hkying 10:30am aten hta, Laiza Golf shaman shakyang shara kaw galaw ai re.
Amyu shayi atsam sharawt tingse sharin wunkat hpe December shata praw 7 ya shani kaw nna December shata 30 ya shani du hkra, Laiza Muklum Amyu Shayi Komiti kaw nna hpaw tawn ai, Ing Raw Ma Shapan Jawng Saranum Majap Seng Brim kaw nna sharin ya ai re lam chye lu ai.
Tingse sharin wunkat galaw ai lam gaw, COVID-19 ana zinli byin nga ai aten hpe majoi n shalai kau ai sha, amyu shayi ni atsam sharawt ai lamang hta shang lawm ai hte akyu rawng ai hpaji lama mi hpe sharin la lu na matu hte COVID-19 ana aten hta masat ding sat hku nna ndai hpe galoi mung, myit dum nga na matu yaw shada ai re lam, Laksan Laiza Muklum Amyu Shayi Komiti Ningbaw Hpawmi Marip Kai Htang tsun ai.
Lamang hta Laksan Laiza Muklum Pati Komiti Amu Madu Salang Kaba Lamai Pan Htoi Awng kaw nna n-gun jaw shatsam mungga shaga ai rai nna, dai ni wunkat yu ai amyu shayi ni a atsam madun tingse dum lamang, masat lu mat ai amyu shayi ni hpe kumhpa shagrau ai hte Hpawmi Lahpai Lung Awng a dinghku sakse hkam lamang, Christmas kumhpa galai ai lamang hte kaga ginsup lamang ni galaw ai re lam chye lu ai.
Laiza Muklum amyushayi atsam sharawt tingse dum wunkat hta, Laksan Laiza Muklum kata nga ai, masha amyu nawku makam masham asak n garan ging hka ai myit lawm ai amyu shayi ni yawng shanglawm sharin mai ai rai nna, daini wunkat yu ai amyu shayi ni marai 10 re lam chye lu ai.
Tingse dum sharin wunkat hpe ndai lang shawng nnan ningpawt ninghpang hku nna Wunpawng Shun madum ladat hpe sharin ya ai rai nna, matut nna grau chye jat wa hkra ning gam shatsaw nna bai sharin sa wa na masing ni nga ai lam chye lu ai.
