(73) lang na Jinghpaw Mungdaw nhtoi hta Jinghpaw Wunpawng amyusha ni yawng amyusha dawnghkawn sharawt na
Photo Credit; Internet
(73) lang na Jinghpaw Mungdaw nhtoi rai nga ai January 10 ya shani hta, Jinghpaw Mungdaw hte Mungmyit Sinli Ga ( Kachin-Sub-state) ginra shagu hta shanu nga ai Jinghpaw Wunpawng amyusha ni yawng, amyusha dawnghkawn sharawt sa wa na matu, Wunpawng Amyusha Zinlum Hpung kaw nna ndau shana da ai lam chye lu ai.
“Kanu Mungdan hte Mungmyit Sinli Ga ginra shagu hta myusha dawnghkawn sharawt ai lachyum gaw, anhte a lamu ga, anhte a mungdan re ngu ai hpe lachyum shaleng mayu ai majaw re. Amyusha ni kahkyin gumdin zinlum wa nna myusha lam yan hta myit hkrum wa na matu ngu yaw shada ai re lam,” Hpakant Wunpawng Amyusha Zinlum Hpung Amu Madu Salang Dashi Naw Lawn tsun ai.
Wunpawng amyusha zinlum hpung kaw nna woi awn nhtawm amyusha dawnghkawn sharawt ai lam hpe (67) lang na Jinghpaw Mungdaw Nhtoi kaw nna galaw hpang sai rai nhtawm, (7) lang ngu na 2021 ning hta gaw Mungmyit Sinli Ga ( Kachin-Sub-state) ginra ni hta mung, amyusha dawnghkawn hpe sharawt hpang na matu hkyen lajang nga ai re.
Dawnghkawn sharawt ai mahkyen lamang hta amyusha ni yawng myit hkrum mangrum lu na matu 2021 ning January shata nhtoi 10 ya shani jahpawt hkying 6:15am aten hta dawnghkawn sharawt nna shana hkying 6:00pm aten hta, dawnghkawn hpe dawm jahkrat na re lam chye lu ai.
Jinghpaw Mungdaw nhtoi hta Jinghpaw Wunpawng amyusha nta htinggaw shagu rap rap ra ra rai nna, Jinghpaw Mungdaw hte Kachin Sub-State ni yawng amyusha dawng hkawn hpe sharawt na lam, anhte amyusha ni yawng ndai nhtoi hpe myit dum nga na lam Wunpawng Amyusha Zinlum Hpung ni tsun shana da ai re.
2019 ning December shata kaw nna hpang wa ai COVID-19 kap bra ana zinli a majaw, daining gaw lai wa sai shaning hte maren Jinghpaw Mungdaw nhtoi hpe wu wu di di nlu galaw ai raitim, lamang kaji hku nna dawnghkawn sharawt nna hkungga jaw ai, akyu hpyi la ai lamang nga na re hpe mung chye lu ai.
