Manmaw Ginwang, Aungta mare kaw manau shadung galaw hpang nga sai
Manmaw Ginwang Htunghking hte laili Laika Hpung kaw nna madung woi awn nhtawm Manmaw Ginwang, deng lahkawng Aungta mare lawk kaw htunghking masat ai manau shadung hpe gaw gap hpang nga sai lam chye lu ai.
Manmaw ginwang kaw manau shadung manau wang gaw gap hpang wa ai yaw shada lam gaw,
“Jinghpaw mungdaw hta manmaw mare gaw number 2 kaba dik ai muklum mare re majaw ndai manau shadung hpe gaw anhte amyusha ni yawng kahkyin gumdin wa na shara langai mi re ngu masat let jawm shakut myit mang yaw shada wa ai lam re. Bai du na shaning ni hta mung ramma ni shang lawm ka manawt mai ai, yawng myit hkrum myit ra hte shapraw lu ai, htunghking masat kaba langai mi rai u ga ngu yaw shada ai” nga nna Manmaw Ginwang Htunghking hte Laili laika Hpung Ningtau Ningbaw Salang Kareng Naw Tawng tsun ai.
Manmaw ginwang hta Manau shadung hpe tara shang gaw gap lu na matu lai wa sai 2020 ning February shata kaw nna masing jahkrat let seng ang ai asuya hpang de laika bang nhtawm ta tut hkrang shapraw galaw ai lam hpe 2020 ning December shata kaw nna hpang wa ai re.
Manau shadung hpe tsaw de pe (57) tsaw nna kaba de shadaw grup rai yang pe (250) tup kaba hkra hkyen lajang nga ai rai nhtawm, ndai manau shadung hte manau ka ai ginra ma hkra hpe shata masum laman hta ngut kre hkra masing jahkrat da ai re.
“Jinghpaw mungdaw a number 2 kaba dik ai muklum mare rai nga ai manmaw muklum kata kaw myusha yawng hpe zinlum lu ai manau shadung, manau wang byin tai wa lu na matu masing jahkrat let hkyen lajang nga ai lam hta myusha ni yawng mung hpaji jaw, n gun jaw mai ai. Akyu hpyi garum la mai ai. Ja gumhpraw ni hpe mung dang di ai made, shawang tsawra myit hte garum shing tau la mai ai nga nna,” manmaw htunghking hpung ni tang madun da ai re.
Manau shadung hte manau ka ai ginra yawng ngut kre hkra rai yang gumhpraw lap sen hkying masum masum tsa jan (3,300,000,000 kyast)hkrat ra na rai nhtawm manmaw ginwang kata hta shawng ningnan lang na manau shadung re hpe mung chye lu ai.
