Shingnan hpung shang masha nnan hkalum hpawng galaw

Shiga Magam Dap Pati Lakung na Wunpawng Mungdan Shanglawt Hpung (KIO) shingnan hpung shang masha nnan hkalum hpawng hpe January shata praw 6 ya jahpawt hkying 10:00am aten hta, Laiza Muklum, Shiga Makan Dap Zuphpawng Gawknu kaw galaw la lu sai re.

Shingnan hpung shang salang nnan marai 11 rai nna, Shiga Magam Dap kata daining gaw hpung shang masha grau law hkra jat la lu ai re lam chye lu ai.

Shingnan hpung shang masha (PP) salang nnan ni hpe hkalum shakram ai lam, akyu hpyi ya ai lam galaw ai rai nna, Shiga Magam Dap Pati Lakung Tingnyang Up Salang Kumshan Jhon Awng kaw nna, PP salang ni hpe Pati a lam sang lang dan ai hte numhtet shatsam mungga shaga ai re.

Hpawng lamang hta, Shiga Magam Dap Pati Lakung na PF, PP salang ni hte Shiga Magam Dap magam gun ni sa du shang lawm ai re lam chye lu ai.