IDPs bai wa na hte seng ai lam masan bawngban hpawng galaw

Kutkai Ginwang kata na hpyen yen mare ni tinang mare buga kahtawng de bai nhtang wa na lam hte seng ai lam masan bawngban hpawng hpe Kutkai Ginwang kata nga ai IDPs camp na lit nga ai komiti ni hte KGZ hpyen yen zinglum hte hpyen yen bai wa na hte seng ai komiti ni kaw nna January shata praw 6 ya jahpawt hkying 9:00am-2:00pm aten laman, Kutkai buga nawku htingnu kaw bawngban dawdan la lu sai lam na chye lu ai.

“Anhte Kachin amyu sha ni tinang a buga lamu ga n tat na matu, htuk manu tsawm htap si mani ai hku lu wa na matu yaw shada ai hku rai nga” nga nna Kutkai Ginwang Gunrun Amu Madu, hpyen yen bai nhtang wa na komiti tingnyang up hpu-awn Rev. Lahpai Zau Htu tsun ai.

Kutkai Ginwang kata na tinang mare buga de bai nhtang wa na buga ni gaw, Nahkyem buga, Belehem buga hte Namhpaka buga ni re lam chye lu ai.

Nkau htinggaw 12 gaw Loi Sam Sip Pa kaw January shata hta htawt sit na rai nna, htinggaw 40 gaw Kutkai makau Balawng mare Namteng Wanbaw kaw htawt sit ya na masing nga ai lam, Kawng Ring Manlung mare ni mung, dai ning na ginhtawng laman htawt sit na matu yaw sing da ai lam chye lu ai.

Ndai bawngban hpawng hta, IDPs camp shagu na kanu kawa komiti salang ni, hpyen yen hpe hkaptau hkalum nga ai buga madu ni, hpyen yen lakawn lanawn zinglum komiti ni hte Kutkai buga hpung magam gun ni sa du shang lawm bawngban ai rai nna, ndai lam masan bawngban hpawng gaw shawng nnan galaw re lam chye lu ai.

Photo Credit; Kgz Nsen