Lai Nawng Hku (Man Wai) mare hpyen yen ni a lamuga jarit masat shadaw jun

Ka Mai Muklum, Lai Nawng Hku (Man Wai) mare hpyen yen mungshawa ni a lamu ga hpe makawp maga lu na matu, Lai Nawng Hku (Man Wai) mare hte Munyin Shawk Wa mare lapran kaw January shata 11 ya shani 2:00pm aten hta, lamu ga jarit masat shadaw hpe akyu hpyi jun masat ai lam chye lu ai.

Ya na zawn jarit masat shadaw jun ai lam gaw Lai Nawng Hku (Man Wai) mare masha ni a lamu ga hpe kaga masha ni madu la kau ai lam nbyin na matu, ndai lamu ga gaw, madu nga ai uphkang ai masha nga ai ngu yaw shada let, jarit masat shadaw jun ai re lam, masat shadaw jun ai kaw sa du shang lawm ai Rev. Maran Seng Awng tsun ai.

Shadaw hpe wut, nlung ni hte ngang kang ai hku nna jung masat da ai rai nna, ndai hpyen yen ni a lamu ga hpe seng ang ai kanu kawa ni, uphkang ai ni kaw nna makawp maga ya na hpe ra sharawng ai lam chye lu ai.

Ndai Lai Nawng Hku (Man Wai) mare masha ni gaw, laiwa sai 2017 shaning kaw nna Ka Mai, Htoi San Yang lawk kaw hpyen koi yen nga ai ya aten du hkra re majaw, hpyen yen mungshawa ni a lamu ga hpe makawp maga ai hku nna jarit masat shadaw jun ai rai nna, hpyen yen htinggaw KBC camp kaw htinggaw 31, RCM camp kaw htinggaw 14 nga ai lam chye lu ai.