Putao Ginwang kata na mare kahtawng 10 jan hpe lockdown tara masat jahkrat da

Ding Dung Ginwang Ginjaw, Putao Ginwang kata na mare kahtawng 10 jan hpe January shata 15 ya shani kaw nna January shata 28 ya shani du hkra, nhtoi 14 ya tup lockdown tara masat jahkrat da ai lam, Putao Ginwang COVID-19 Ana Zinli Makawp Ninghkap Komiti kaw na chye lu ai.

Lockdown masat da hkrum ai mare ni gaw, Htingnan mare, Hka Hpawang mare, Warum Hku, Lung Wang mare, Dumgan mare, Gawn kahtawng, Hkindu Yang mare, Um Dingsa mare, Bum Noi mare, Putao Ginwang Daw kata na mare kahtawng ni hte Masat (7) Dap Dung hpe Lockdown masat da ai re lam chye lu ai.

Putao Ginwang kata de du shang ai bu hkawm masha ni hpe san da ai Quarantine Dabang ni hta, hkamja lam masam maram hkamla nna hkawm sa hkawm wa ahkang jaw da ai hta, Putao ginwang de du shang ai bu hkawm masha marai (3) masat da ai check point lam hku nre ai sha, lagu shang wa nna tinang ginwang kata pru prang hkawm ai hpe jep mu lu ai majaw, ndai mare kahtawng hte magam dap ni hpe lockdown masat da ai lam re hpe chye lu ai.

Lockdown masat da ai aten laman mare kahtawng shada pru shang hkawm sa ai lam tsep kawp n galaw na matu hte Mawdaw, Sengke hte kunrai htinglet ai lam hpe mung gan jahkring na re lam, si hkrung si htan hte kaga ra ahkyak nna hkawm sa ra ai lam ni nga wa yang, COVID-19 Ana Zinli Makawp Ninghkap Komiti hpe tang madun shana na lam, Putao Ginwang COVID-19 Ana Zinli Makawp Ninghkap Komiti kaw nna chye lu ai.