Dapnu ( 11 ) kata na Myen hpyen hpung ni mungshawa ni a arung arai mya la ya
Mungmyit Sinli Ga, Kachin Sub-State KIA Dap Ba ( 6 ) Dap Dung ( 36 ) ginra, Mungbaw Ginwang Daw, Man Kawng mare mungshawa ni a dum nta na arung arai ni hpe Dapnu
( 11 ) kata na Myen hpyen hpung ni March 25 ya shani mya la kau ya ai lam na chye lu ai.
Ndai mare makau e March 24 ya shani KIA Dap Dung ( 36, 38 ) na hpyen hpung hte Dapnu ( 11 ) kata na Myen hpyen hpung ni laja lana gasat gala majan byin ai majaw, mare masha ni Man Pying mare hpung wang de gan yen machyu ra mat ai re lam hpe chye lu ai.
March 27 ya shani Man Kawng mare myit su salang ni, Man Pying mare uphkang salang ni hte nawku hpung sara ni, Man Pying mare kaw du nga ai, စစ္ေၾကာင္းမွဴး wa kaw sa nna ya aten mare de mai wa nmai wa sa san jahkrup ai shaloi, Myen hpyen du wa gaw mai wa sai ngu tsun ai majaw, March 28 ya shani mare de wa yu yang nta hkan na arung arai ni sawk mya la kau ya ai lam, dai ginra na mare masha ni tsun ai kawn chye lu ai.
