Mazut roirip hkrum ai Saranum Maran Lu Ra hte Tangbau Hkawn Nan Tsin yan a (6) ning hpring myit dum akyu hpyi hpawng lamang galaw
Namtau Buga, Shubuk Kawnghka mare kaw January shata 19 ya shani hta, mazut roirip sat kau hkrum ai KBC laili laika apnawng saranum Maran Lu Ra hte Tangbau Hkawn Nan Tsin yan a (6) ning hpring myit dum akyu hpyi hpawng lamang hpe galaw la lu sai lam chye lu ai.
Hpawng lamang hta, Muse buga hkalup hpung woi Rev. Ting Ying kaw nna karai mungga jaw ai lam, Pangsai buga hkalup hpung woi Rev. Chyingyu Gam Awng kaw nna akyu hpyi ya ai hte Muse buga hkalup hpung woi Rev. Lashi Labya De Ja kaw nna shaman akyu hpyi ya ai lam chye lu ai.
“Shaning (6) ning hpring sai raitim, ndai shara hpe mu dat shagu gaw, mani mana zawn nga ai hku rai nga ai. Dai majaw ndai gaw mahtai lu na re ngu gaw kam ai raitim mung, anhte ndai hku sha la yang gaw nmai ai anhte akyu mung hpyi ra ai.
Anhte KBC sha n-ga, Wunpawng amyusha ni yawng myit hkrum ai hte ndai hte seng ai shiga hpe kahkyin gumdin nna, KBC Ginjaw kaw nna hpaw ninghtan wa na teng man ai mahtai tam komiti ni hte ta gindun nhtawm, myit hkrum ai hte shiga ni hpe jawm jaw nna, gwi gwi hte tsap yang manghkang galaw ai ni nan yin la nna mahtai kaja hpe lu shapraw sa wa na re” nga nna Mungmau Ginwang Amu Madu Rev. Lahpai Zau Ra tsun ai.
Lamang hta, Mungmau Ginwang E.C kasa ni woi awn nna, Namtau buga a hpung magam gun sara/num ni hte Kawnghka mare hpung masha ni yawng marai 300 daram shang lawm ai hte galaw la lu sai lam na chye lu ai.
Saranum yan gaw laiwa sai 2015 ning January shata 19 ya shana Mungmyit Sinli Kawnghka mare kaw KBC laili laika sasana apnawng nga ai ten, shan lahkawng nga ai nawku hpung wang nta kaw nan mazut roirip sat kau hkrum ai, daining 2021 ning January shata 19 ya shani (6) ning ladu hkrum sai re.
