Laiza Muklum hpaji jawng ni a hkum gawng shakyang sharin lamang ginchyum dat hpawng galaw
Laiza Muklum Hpaji Jawng Pati Lakung ni woi awn galaw ai Muklum hpaji jawng ni a hkum gawng shakyang sharin lamang ginchyum dat hpawng hpe January shata 22 ya shana maga hkying 2:00pm-4:00pm aten laman, Laiza Lahta Tsang Jawng wang kaw galaw la lu sai re.
Hpawng hta gawng shakyang sharin sara ni kaw nna, gawng shakyang madun lamang woi galaw ai. Laiza Muklum Hpaji Du Saranum Kaba Lagang Ja Bu kaw nna hpawng hpaw mungga shaga ai. Dai hpang Laiza Muklum Ningtau Uphkang Du Salang Kaba Chyang Bawm kaw nna hpaji jaw shatsam mungga shaga ai lam chye lu ai.
Sharin la lu ai hkum gawng shakyang hpe jawng kata kaw aten hte aten ginsup sa wa na rai nna, kaga tsang gawk kaw na jawngma ni hpe mung matut manoi sharin sa wa na re lam, Saranum Kaba Singnyen Ja Mai tsun ai.
Gawng shakyang sharin ya ai yaw shada lam gaw, jawngma ni hkumhkrang bawngring galu kaba wa na matu, hkamja zet let wa na matu, wuhpung wuhpawng hte shada da kanawn mazum chye na matu hte madat mara chye ai ni tai wa lu na matu re lam chye lu ai.
Gawng shakyang sharin lamang hta Laiza Lahta Tsang Jawng, Laiza Lapran Tsang Jawng hte Sama Ginwang Sasana Lahta Tsang Jawng kaw na jawngma ni yawng marai 300 daram shang lawm ai rai nna, hkum gawng shakyang hpe Mung Seng Yang hpyen sharin shakyang dap dung kaw na sharin sara ni marai 7 sa du sharin ya ai re lam chye lu ai.
