Ginjaw Ginra Laiza muklum kata pat jasan ramma komiti hpaw ninghtan da lu sai
Laksan Laiza Muklum pat jasan ramma komiti ni a (1) lang na hkrum zup bawng ban hpawng hpe laiza muklum pati komiti ni kaw nna lam woi matsun ai hte January shata 23 ya shani, sinpraw majoi manau wang hta galaw la lu sai re.
Ramma ni a (1) Lang na hkrumzup bawng ban hpawng hta Pat jasan ramma ni, shawng lam hta gara hku shamu shamawt wa ra na ngu ai lawng lam ni hpe ramma ni shada hkrumzup bawng ban ai rai nna ka-ni nanghpam pat jasan ningmu jahpaw gamung naura ni hpe mung hkrang shala madun ai lam galaw ai re.
Anhte laiza muklum hta gaw ndai zawn re ningmu jahpaw hkrumzup bawng ban ai lam law law galaw ai a marang e ka-ni nanghpam hte seng nna gaw yawng ningmu hpaw wa ai majaw ka-ni lu sha ai masha nnga ai daram re ngu mu mada ai, grau na mung nnga wa hkra, grau kaja wa hkra ramma ni nan shading sharai shamu shamawt nna hkawn hkrang wa lu u ga ngu yaw shada ai re lam, Pat jasan ramma komiti ni tsun ai.
Laiza muklum pat jasan ramma komiti hpe 2020 ning December shata kaw nna hpaw ninghtan da sai re. 2020 ning kaw nna Ningmu jahpaw shamu shamawt ai lam ni hpe galaw nga dingyang re hte matut nna galaw sa wa na masing (plan) ni hpe mung tatut hta akyu jashawn jai lang lu hkra hkyen lajang nga ai re.
“Laiza muklum kata na ramma ni sha nrai, makau grup yin hkan na ramma ni kadai raitim mung shang lawm nna ka-ni nanghpam hpe pat jasan ai, ninghkap ai magam bungli ni hta myitsu myitrawt let yawng shang lawm nna shamu shamawt sa wa ga. Ka-ni nanghpam hpe chye matsat ai, tawn kau da ai amyu ni byin tai wa hkra shakut sa wa ga” nga nna laiza Muklum Uphkang Du kaw nna hpungjat tsun shana da ai re.
(1) lang na Laiza muklum pat jasan ramma ni a hkrumzup bawng ban hpawng hta laiza muklum ramma komiti ni, pat jasan ramma komiti ni hte hpung woi kanu kawa ni yawng marai 100 daram sa du shang lawm bawng ban la lu sai re lam chye lu ai.
