J.L.H dakkasu myitkyina ni kaw nna “Ramma hte Sut masa” hkaw tsun hpawng galaw na

Jinghpaw Wunpawng Laili laika hte Htunghking Hpung (J.L.H) Dakkasu Myitkyina ni kaw nna woi awn nhtawm ramma ni hpaji hkaja sa wa ai sha n ga sut masa lam hta mung bawng ring sa  wa lu na matu “Ramma hte Sut Masa” ngu ai hkaw tsun hpawng  hpe january shata (30) ya shani Myitkyina AKYU Center kaw galaw na re lam chye lu ai.

“Anhte wunpawng ramma ni hku nna ndai prat hta hpaji lam sha n ga sut masa lam hta mung gawng kya nga ai hpe mu mada nga ga ai hte maren sut masa lam hta gara hku bawng ring wa hkra galaw sa wa ra ai hpe sharin hkamla let ta tut jai lang hkawm sa wa lu na matu hpe yaw shada ai re lam,” J.L.H Dakkasu ni Myitkyina Amu Madu Tangbau Seng Di Awng tsun ai.

Ramma hte sut masa ngu ai gabaw kata hta sut masa galaw wa ai shaloi arang hpe gara hku hkyen lajang ra na, sut masa galaw wa yang kaning re ai lam ni hpe tau hkrau hkyen lajang da ra na hte sut masa galaw sa wa ai aten hta gara hku kanawn mazum sa ra na ngu ai lawng lam masum hpe madung tawn let sharin sa wa na re hpe chye lu ai.

Hkaw tsun hpawng hta J.L.H dakkasu jawng shagu na ramma ni marai 30 sha hkapla nna galaw sa wa  na re hte “Ramma hte Sut Masa”ngu ai ga baw hpe J.L.H Usa Sut Du Labya Mung Htoi kaw nna sharin ya mat wa na re lam chye lu ai.

J.L.H dakkasu Myitikyina ni kaw nna ramma ni a matu ningmu jahpaw ya ai hkaw tsun hpawng ni hpe galaw nga ding yang re hte matut nna galaw sa wa na masing ni mung nga ai lam chye lu ai.