Ginjaw Ginra, Pa jau, Sha-it Yang kaw (69) lam yan ninggawn mung masa masat shadaw hpaw hpawng lamang galaw
Ningawn mungmasa ka ai ningbaw ningla ni hpe manu shadan chyeju dum ai hku nna (69) Lam Yan Ninggawn Mungmasa Masat Shadaw hpaw hpawng hpe February shata 12 ya jahpawt hkying 7:00 am aten hta Ginjaw Ginra uphkang kata na Pa Jau, Sha-it Yang mare kaw galaw la lu sai re.
(69) lam yan ninggawn mungmasa masat shadaw galaw ai yaw shada lam hpe Ningtau Ninggawn Amu madu Salang kaba Labang Doi Pyi Sar kaw nna sang lang tsun dan ai.
“Yaw shada lam gaw KIO shanglawt rawt malan hpaw wa ai npawt nhpang hta myutsaw masa ngu ai hte rawt malan hpang wa ai raitim laika buk nan shapraw nna hpaw hpang wa ai nre, myutsaw masa ngu ai hte sha gaw gap wa ai re. 1969 ning hta Ginjaw Komiti kaw nna policy laika nan galaw jahkrat ra ai ngu masa a majaw, 69 lam yan ngu ai hta shawng e garai n galaw da ai policy laika (1) Ninggawn mungmasa lam yan laika, (2) Wunpawng mungdan shanglawt hpung hpe gaw da ai tara, (3) KIA hpyen dap hpe hpaw da ai lam, (4) Mungchying uphkang dap hpe hpaw da ai lam, ndai policy laika ni hpe gaw da ai re.
Ndai zawn re policy laika ni gaw da ai hpe daini du hkra ta tut hkan sa hkrang shapraw nga dingyang re. Ndai zawn ningbaw ningla ni galaw mat wa ai magam lit hpe myit yu ai shaloi grai ahkyak grai kaba ai magam lit re ngu hpe mu mada hkam la ai re majaw manu shadan ai, hkungga la ra ai, masat masa galaw ai, chyeju dum ai hku nna myit masin hte sha, n gup aga hte sha, tsun ai hku nhkum zup ai, sak se sak gan masat dingsat nan galaw yang kaja ai ngu myit pru wa ai hte ndai masat masa shadaw hpe galaw hpang wa ai re.”
Shang lawt rawt malan labau hpe sagawn yu ai shaloi, 1957 ning hta Yangon dakkasu hta hpaji sharin nga ai myutsaw ramma marai (7) kaw nna byin pru wa ai sanit majan (Seven star) ngu ai lachyum hte Wunpawng amyu ngu ai hta baw sang sanit rawng ai lachyum hpe shaleng nhtawm ninggawn mungmasa masat shadaw hta jut sanit shalawm nna (69) lam yan ninggawn mung masa ka shalat ai ningbaw ni a mying shingteng hpe mung ka shakap da ai re hpe chye lu ai.
Masat shadaw hpe 2020 ning November shata kaw nna masing jahkrat hpang sa wa ai rai nhtawm 2021 ning Febeuary shata 12 ya jahpawt hta Ginjaw Komiti Salang Du Daju N-gan Zau Hkum kaw nna Ninggawn mung masa masat shadaw hpaw hpawng pangrang rep shaman ga tsun ya sai re.
Zuphpawng hta Ginjaw Komiti Salang ni hte mungshawa ni sa du shang lawm nna Masat shadaw ngang grin na matu, wunpawng amyu sha yawng a matu akyu hpyi hkamla lu sai re.
Ninggawn mung masa lam yan hpe (BRIG) Du Up Daju Lahtaw Zau Tu, Salang Kaba Pungshwi Zau Seng, Salang Kaba Lanyaw Zawng Hra, (LT.COL) Lat Du Up Jum Lahtaw Zau Dan hte (MAJ) Du Up Mali Zup Zau Mai ni kaw nna (1969 ) ning hta ka shalat hpang da ai re hpe mung chye lu ai.
