Rudi amyusha ni yawng pawng nna gumshem ai Myen Hpyen Dap Asuya hpe ninghkap shawa n-gun madun

Hpakant Rudi amyusha ni yawng shanglawm let Hpakant Muklum kaw February shata 19 ya jahpawt 8:30am aten kaw nna 12:00pm aten du hkra gumshem ai Myen Hpyen Dap Asuya hpe ninghkap shawa n-gun madun lamang bai galaw ai lam chye lu ai.

Shawa n-gun madun lamang hta, Hpakant ginra hta shanu shingbyi nga ai Wunpawng bawsang amyusha ni, Sam amyusha, Hkang amyusha hte CDM wuhpung wuhpawng ni shanglawm let, shawa n-gun Mun mi jan daram shanglawm ai hte galaw ai lam chye lu ai.

Daini anhte a Mungdan hta, gara asuya mi lung wa ai raitim anhte a matu gaw, nga npyaw myit npyaw ai majaw, gumshem magam lai len tsep kawp hkoi tsai mat na matu yaw shada let, amyusha ni hta ra nga ai tara rap ra ai ahkaw ahkang lu la na matu shanglawm n-gun madun ai re lam, n-gun madun lamang hta shanglawm ai Salang Latung Sau Bawm tsun ai.

Sam amyusha ramma shadang Sai Hpa kaw nna Myen hpyen gumshem lai len ladat hpe ninghkap nra sharawng ai lam, Munghpawm Mungdan hta shanu nga ai rudi amyusha ni hte htawmhpang na kashu kasha ni a matu tara rap ra ai ahkaw ahkang lu la na matu ninghkap n-gun madun ai re lam, Rawang amyusha langai kaw nna mung, Democracy Mungdan lu na matu n-gun madun lamang hta Rawang amyu lakung ni yawng shanglawm ga nga nna tsun ai.

Hpakant Muklum kata hta, February shata 12 ya shani kaw nna lani mi din kalang hku nna shawa n-gun madun lamang ni galaw nga ai rai nhtawm, matut manoi n-gun madun lamang galaw sa wa na re lam chye lu ai.

Ya na zawn gumshem ai Myen Hpyen Dap Asuya hpe ninghkap nra sharawng shawa n-gun madun ai hpe Myen Mungdan shara shagu hta shani shagu galaw nga ai rai nna, Myitkyina Muklum kata hta gaw shawa n-gun madun ai hta shanglawm ai ni hte CDM shamu shamawt ai ni hpe Myen Hpyen Dap, Balik Dap ni kaw nna hkan rim zingri ai lam, dingbai dingna jaw ai lam galaw nga ai majaw, mungshawa ni n-gun madun ai lam hta mayak mahkak byin hkrum nga ai lam na chye lu ai.

Photo Credit; Naw Htoi Lashi