Hpyen gumshem gasat shamyit hkristan pawng hpawm akyu hpyi lamang kaba galaw

Hpyen Gumshem Gasat Shamyit Ninggawn Mungshawa N-gun Madun Woi Awn Komiti kaw nna woi awn nhtawm, nawku tingnyang hpe MCC (Myitkyina Hkristan Kongsi) kaw nna lit la woi awn ai hte Myitkyina, Shatapru Nau Ra Ginsup Pa kaw February shata 22 ya jahpawt 9:00am aten hta, hkristan pawng hpawm akyu hpyi hpawng kaba galaw ai lam na chye lu ai.

“Gumshem hpyen lai ladat mat na matu, 2008 gawda tara jahten shaza kau lu na matu, anhte ra sharawng nga ai Federal Democracy Mungdan lu la na matu hte CDM hta shanglawm ai magam gun ni yawng a matu ngu na myit dum let karai kasang kaw akyu hpyi ai lam hpe madung yaw shada let galaw ai akyu hpyi hpawng re” nga nna, Hpyen Gumshem Gasat Shamyit Ninggawn Mungshawa N-gun Madun Woi Awn Komiti kaw na Sara David tsun ai.

Hpawng hta, akyu hpyi ai lam, mungga madat hkam la ai lam, mahkawn shakawn ai lam, akyu hpyi shaman ya ai lam galaw ai sha n-ga, lamang galaw ai yaw shada lam hpe tsun dan ai lam, shawa hku nna anhte byin mayu ai lam hpe akyu jawm hpyi ai lam ni galaw ai re hpe chye lu ai.

Anhte a yaw shada lam de du wa ai shani du hkra nbung ai ladat amyu myu hte mungshawa yawng shanglawm let n-gun madun ai lam, anhte ra ai hpe ndau ai lam ni matut nna galaw sa wa na re majaw, mungshawa yawng shanglawm na matu saw shaga ai lam, Hpyen Gumshem Gasat Shamyit Ninggawn Mungshawa N-gun Madun Woi Awn Komiti kaw nna tsun lajin da ai re.

Dai ni na akyu hpyi hpawng lamang hta, Makam masham hpung shagu hte buga hpung shagu na hpung shawa n-gun yawng marai 10000 mi daram shang lawm ai hte lam hkawm shawa n-gun madun ai lamang ni galaw ai lam chye lu ai.

Photo Credit; KBC Kachin