KIA hte Myen Hpyen Dap ni gasat gala matut manoi byin
Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra, Kutkai Ginwang, Ja Bum Ginwang Daw kata hta Myen Hpyen Dap, Dapnu (99) kata na hpyen n-gun 300 jan, KIA ni shara la nga ai Nawng Chu Bum de matut manoi htu shadut lung wa ai majaw, February shata 23 ya jahpawt hkying 8:30am aten kaw nna, shana maga hkying 2:00pm aten du hkra laja lana gasat gala majan byin ai lam chye lu ai.
Myen hpyen hpung ni gaw, Dima maga hku na hpyen man 2, Daknai maga hku 1 hte Lunghtang Sauhaw maga hku nna 1 rai yang, hpyen man 4 hku htu shadut lung wa ai. Dima mare baw kaw nga ai Myen hpyen hpung ni mung sinat kaba hte gap bun ai re lam, shawng lam salang langai tsun ai.
Masat (4) Dap Ba, Masat (8) Dap Dung kata na KIA hpyen hpung ni mung Kutkai kaw nna, gasat gala majan byin ai shara de hpyen n gun jat lung wa ai 4w Modo 3 kaw na Modo 1 hpe hkap gap shingla kau lu ai lam chye lu ai.
KIA Masat (4) Dap Ba hte Masat (6) Dap Ba ginra ni de Myen hpyen dap ni hpyen n gun law law hte matut manoi htu shadut lung wa nga ai majaw gasat gala majan naw byin wa mai ai lam, shawng lam shi sawk ni kaw na chye lu ai.
