KIA hte Myen Hpyen Dap ni gasat poi shara shagu byin
Mungmyit Sinli Ga (Kachin Sub-state) KIA Masat (10) Dap Ba, Masat (2) Dap Dung ginra hte KIA Masat (4) Dap Ba, Masat (39) Dap Nawng Dap Dung hpyen hpung hte Myen hpyen dap ni February shata 24 ya shani gasat poi byin ai lam na chye lu ai.
KIA Masat (10) Dap Ba, Masat (2) Dap Dung ginra, Mung Ji Ginwang Mung Paw hte Nam Jawn lapran Kawng Jung Myen Dap hpe February shata 24 ya jahpawt 4:30am ten hta, KIA MHH Dap Dung (2) ni sa htim gap ai lam na chye lu ai.
February shata 24 ya shani hkying 12:45pm aten hta mung, Myen Hpyen Dap, Dapnu (99) kata na hpyen hpung ni shamu shamawt nga ai Bum Sum Shi (Loi Sam Sip) bum lawu Ga Leng shang wa ai lam hte Lashio yu wa ai lam num she kaw Myen hpyen hpung ni hpe Masat (39) Dap Nawng Dap Dung ni hkap shingla gasat ai kawn gasat poi byin ai re nga nna, shawng lam ginra na lit nga ai salang ni tsun ai.
Ya na zawn Mungmyit Sinli ginra hta, KIA hte Myen Hpyen Dap ni gasat poi jahkring hkring byin ai gaw, KIA hpyen hpung ni dap jung shara la nga ai ginra de Myen Hpyen Dap ni, hpyen n-gun law law hte shamu shamawt htu shadut lung wa nga ai majaw matut nna gasat poi naw byin wa mai ai lam chye lu ai.
