Manje Muklum kata hta myen hpyen dap a matsun hte maren Yi, Sun, Hkauna Eka jahpan hta gahkyin nga

Manje township, Manje muklum kata kaw myen hpyen dap asuya a matsun re ngu nhtawm, mungshawa ni galaw lu galaw sha nga ai yi, sun, hkauna Eka jahpan hta gahkyin nga ai lam buga masha ni shana wa ai kaw nna chye lu ai.

“Manje ninghtawn kata hta gaw Eka jahpan hpe hta gahkyin nga dingyang re. Raitim anhte mungshawa ni gaw hpyen asuya uphkang ai rai yang, moi na zawn Eka (1) mi kaw mam Tang kade dut bang ra na ngu ai zawn re lawng lam ni bai byin wa na, moi na zawn re aten de bai du wa na hpe grai hkrit tsang nga ai,” nga nna Manje mare na Salang langai tsun dan ai.

Yi, Sun, hkauna Eka jahpan hta ai lam hpe February shata 23 ya shani kaw nna hta gahkyin hpang taw nga sai re hte, matut manoi hta gahkyin nga ai re hpe mung chye lu ai.

“Lit nga ai salang ni jahpan hta gahkyin ai aten hta mungshawa ni kawn moi na zawn rai nna mam dut bang ra wa ai baw nre i ngu san ma ai. Ya gaw Democracy aten re sai majaw moi na zawn gaw nrai na sai nga tsun ai majaw nkau mungshawa ni gaw Eka jahpan bang ai ni mung nga ai. Nkau mi gaw hkrit tsang ai hte nbang gwi let nga taw ai ni mung nga ma ai” nga nna salang langai tsun dan ai.

Eka jahpan hta gahkyin ai lam hpe Manje ninghtawn kata hta hpang taw nga sai raitim, Manmaw ginwang kata na Nmawk township, Manmaw township hte Shwe Gu township ni hta Eka jahpan hta gahkyin ai lam nnga shi ai re hpe mung chye lu ai.