Myen hpyen hpung ni hkam tawn ai Bawm, mungmasha ni kapaw la
Mungmyit Sinli Ga, Kachin Sub-State KIA Dap Ba ( 6 ), Dap Dung ( 36 ) ginra hta shamu shamawt nga ai Myen hpyen hpung ni hkam tawn ai bawm langai hpe March 30 ya shana
maga hkying 05:30pm aten daram hta Hpai Kawng mare gawdin pa makau mawdaw lam kaw mungmasha marai lahkawng kapaw hkrum ai lam na chye lu ai.
Bawm kapaw la ai mungshawa yan gaw, Kawng Yau mare kaw nga ai salang Lahpai Awng Mai hte madu jan Lahtaw Bawk Tawng yan rai nna, shan yan kumshu sun na Cycle hte wa ai shaloi mawdaw lam ka-ang kaw hkam tawn ai bawm langai shan lahkawng a Cycle hpang leng hte wa hkra kapaw la ai re lam, dai buga na salang langai tsun dan ai kawn chye lu ai.
Salang Lahpai Awng Mai gaw hpa nra ai raitim, madu jan Lahtaw Bawk Tawng asak ( 33 ) ning, hkra lagaw kaw bawm hkyep langai wa rawng mat nna, ya aten Miwa mung tsi rung hta, tsi tsi hkam la nga ai lam chye lu ai.
Ya byin ai shara hte kade ntsan ai kaw, lai wa sai shata lahkawng daram hta mung kalang byin ga sai, dai shaloi gaw masha hpa nra ai lam, salang wa matut tsun ai kawn chye lu ai.
