KIA hte Myen Hpyen Dap ni matut manoi gasat poi byin
Mungmyit Sinli Ga (Kachin Sub-state) KIA Masat (4) Dap Ba, Masat (8) Dap Dung ginra, Namhpaka Ginwang, Namhpaka hte Kutkai lapran, Hpangngawm mare makau Nam Hpulun Bum kaw February shata 26 ya jahpawt hkying 9:00am-10:00am aten daram hta, KIA Masat (29) Dap Nawng Dap Dung hpyen hpung ni hte Myen Hpyen Dap, Dapnu (99) kata na hpyen hpung ni maut manoi gasat poi byin ai lam na chye lu ai.
Myen hpyen hpung ni gaw Hpangngawm mare maga de February shata 25 ya shana shamu shamawt hkawm nna, dai hpawt bai nhtang wa ai kaw KIA hpyen hpung ni hte ang katut gasat poi byin ai re lam, shawng lam na lit nga ai salang ni tsun ai.
February shata 26 ya shani hkying 11:00am aten hta mung, Hpangngawm mare kaw na mare masha marai 7 hpe Myen Hpyen Dap kawn, lam madun na matu shaga woi mat ai hta, Jawng Bren mare (Balawng mare) kaw du yang bai nhtang wa shangun ai hkying 2:30pm aten, dum nta kaw bai du wa sai lam, mare masha ni tsun ai kaw na chye lu ai.
February shata 26 ya shani hkying 12:20pm aten hta sha, KIA Masat (10) Dap Ba, Masat (2) Dap Dung ginra, Hu Et mare makau kaw Mung Ji kaw na lung wa ai Myen hpyen n-gun 100 daram hte KIA ni gasat poi byin ai lam na chye lu ai.
Ya aten Myen Hpyen Dap ni gaw wuhpung garan nhtawm, hpyen n-gun law law hte gasat poi byin ai makau grup yin kaw dingyang naw shamu shamawt nga ai majaw, KIA ni dap jung shara la nga ai shara de matut manoi htu shadut lung wa ai rai yang, gasat poi ni matut nna naw byin wa mai ai lam, shawng lam na lit nga ai ni tsun maram da ai re.
