Hpyen n gun hte malu masha htaw lung wa ai Myen hpyen modo hpe KIA ni hkap gap

Mungmyit Sinli Ga (Kachin Sub-state), KIA Dap Ba Masat (4) Dap Ba hte Masat (10) Dap Ba ginra de, Lashio maga kawn hpyen n gun hte malu masha htaw lung wa ai Myen hpyen modo hpe February shata 27 ya shani KIA ni hkap shing la gasat ai lam na chye lu ai.

“Dai hpawt hkying 10:00am aten daram hta hpyen la htaw ai modo hte malu masha htaw ai modo 2 hpe anhte kaw na ni Namtun hte hka lum lapran kaw bawm hkap dep bun ai” nga nna shawng lam na lit nga ai salang langai tsun ai.

Sinli hte Kuthkai lapran na Man Pying mare kaw mung hpyen modo 8 lung wa ai hpe KIA hpyen hpung ni sinat hte hkap gap ai hta modo 3 gaw dai shara kaw hkring mat nhtawm, ngam ai modo 5 gaw Kuthkai de lai shang mat ai re lam, salang wa tsun ai.

Ya aten hta KIA Dap Ba(4) Dap Ba (6) hte Dap Ba (10) ginra ni de, Myen Hpyen Dap, Dapnu (88) hte Dapnu (99) ni gaw hpyen n gun malu masha matut manoi htaw bang nga ai re lam, ginra shisawk ni kawn chye lu ai.

KIA Dap Ba (3) Dap Dung (1), Dap Dung (12) hte Dap Dung (27) ginra de, February shata 22 ya shani, Monyin kaw dap jung ai Hk.L.Y (15) dap na Myen hpyen hpung ni modo kaba masum hta malu masha hte hpyenla hpring hpring htaw nna lai lung wa sai lam chye lu ai.

Photo, facebook