KTC, Kutkai chyum jawng a (54) lang na jawng yu hpawng hte magam gun ladaw (25), (40), (50) ning hpring shagrau sha-a hpawng galaw

Jinghpaw Wunpawng Chyum Hkawlik, Kutkai chyum jawng a (54) lang na jawng yu shagrau hpawng hte magam gun ladaw (25) ning, (40) ning, (50) ning hpring jan sai kanu kawa ni hpe March shata praw (1) ya shani hkying 10:00am kaw nna hkying 1:00pm aten du hkra chyum jawng wang hta shagrau sha-a hpawng galaw ai lam chye lu ai.

Jawng yu shagrau hkam la ai jawng ma ni gaw Certificate in Theology (C.Th), Bachelor of Theology (B.Th), Licentiate Theology (L.Th), Bachelor of Ministry (B.Min) hte Hkai rem Program ni kaw nna yawng marai 53 re hpe chye lu ai.

“Daini jawng yu ai ni gaw masat da ai sharin shadang mung hpring sai hte maren tinang a buga de bai wa apnawng ra sai re majaw shanhte a  buga hta bungli galaw ai aten dut dang ai lam nbyin hkra hte hpaji matut hpung jat mayu ai ni a matu Certificate hpe jaw ya mayu ai majaw dai ning na COVID-19 kap bra ana zinli hte Myen mung a mungmasa tsang ra ai lapran hta ya na zawn jawng yu shagrau hpawng galaw ai lam re” nga nna KTC jawng up Rev.Lahtaw Zau Awng tsun ai.

2019 ning December shata kaw nna byin hpang wa ai COVID-19 kap bra ana zinli a majaw jawng yu shagrau hpawng hpe shawoi shaning na hte maren wu wu di di nlu galaw ai raitim, jawng up hte sharin sara/ sananum ni, jawngma ni hte kanu kawa ni sa du shang lawm let jawng yu hpawng hpe kaji ai hku galaw la lu sai re hpe chye lu ai.

KTC, Kutkai chyum jawng hta ngam nga ai subject program ni hpe mung online hte hpaji matut sharin hkaja nga ai rai nna, Music program, M.Div (First year) hte English program hta lung na jawngma ni hpe gaw jawng wang kata hta yup sha nga let, sharin lu hkra hkyen lajang nga ai re hpe mung chye lu ai.

Photo Credit; Jut Nlung