KIA hte Myen Hpyen Dap ni gasat gala majan byin
Mungmyit Sinli Ga (Kachin Sub-state) KIA Masat (6) Dap Ba, Masat (36) Dap Dung ginra, Munggu Ginwang, Mungbaw Ginwang Daw, Bum Tawn Ninghtawn, Namhkawng Bum, Man Dau mare ntsa kawng kaw March shata praw 4 ya jahpawt hkying 7:30am-12:50pm aten lapran, KIA Masat (36) Dap Dung hpyen hpung ni hte Myen Hpyen Dap Hk.L.Y (287) hpyen hpung ni gasat gala majan byin ai lam na chye lu ai.
Myen Hpyen Dap, hpyen n-gun 100 jan daram gaw, March shata praw 3 ya shana maga Nam Hkyek Bum kawn yu wa nna, Mai Hpang mare kaw malu masha wa hkyen la nhtawm, March shata praw 4 ya jahpawt KIA hpyen hpung ni dap jung shara la nga ai ginra de shamu shamawt htu shadut lung wa ai majaw, gasat gala majan byin ai re lam, shawng lam shisawk ni tsun ai.
Myen hpyen hpung ni gaw Man Dau mare kaw na mungshawa marai 3 hpe mung, dai hpawt maga shaga woi mat ai hta, ya aten du hkra raitim garai ndat ya shi ai lam, gasat gala majan a majaw Man Dau mare kaw na mungshawa ni mung hkrit tsang nna, Man Nawng kawng mare de gan koi yen nga ai lam, salang wa matut tsun ai kaw na chye lu ai.
KIA hpyen hpung ni hte Myen Hpyen Dap, Dapnu (99) kata na hpyen hpung ni gaw, Mungmyit Sinli Ga (Kachin Sub-state), KIA Hpyen Dap ni dap jung shara la nga ai ginra hta, laiwa sai February shata 11 ya shani kaw nna March shata praw 4 ya shani du hkra shani shagu ngu na daram gasat gala majan byin nga ai re lam chye lu ai.
