KIA hte Myen Hpyen Dap ni gasat gala majan bai byin
Mungmyit Sinli Ga (Kachin Sub-state) KIA Masat (6) Dap Ba, Masat (9) Dap Dung ginra, Dima hte Nam-um mare lapran kaw March shata praw 8 ya jahpawt hkying 8:30am aten hta, KIA Masat (9) Dap Dung hpyen hpung ni hte Myen Hpyen Dap, Dapnu (99) kata na hpyen hpung ni gasat gala majan byin ai lam na chye lu ai.
Myen Hpyen Dap ni gaw, KIA Hpyen Dap ni dap jung shara jahkrat tawn ai makau grup yin hkan, KIA hpyen hpung ni hpe hkan tam gayin hkawm nna, hpyen shamu shamawt htu shadut ai lam dingyang galaw ai majaw, gasat gala majan byin ai re lam, shawng lam na lit nga ai salang langai tsun ai.
Shani hkying 10:15am aten daram hta mung, KIA Masat (4) Dap Ba, Masat (29) Dap Nawng Dap Dung hpyen hpung ni hte Myen Hpyen Dap ni Namhpalun mayan kaw gasat gala majan byin ai re.
“Gasat gala ya hkyak hkyak gaw naw zim nga ai re, Myen Hpyen Dap ni shanhte hku nna matut naw htu shadut wa yang, gasat gala majan naw byin wa mai ai lam nga ai hku re” nga nna salang wa matut tsun ai.
Gasat gala byin ai hta, KIA maga hkra machyi ai lam nnga ai rai nna, Myen Hpyen Dap maga gaw machyi hkrum ai lam tup hkrak nchye lu ai raitim, sum machyi ai lam law ai re hpe na chye lu ai.
Ya aten KIA Masat (6) Dap Ba ginra de, Nam-um maga kawn Myen Hpyen Dap ni, hpyen n-gun jat nga dingyang re lam na chye lu ai.
