Putao CDM kaw shanglawm ai hpaji jawng magam gun ni hpe CDM kaw n shanglawm na matu shagyeng ta masat htu shangun

Puatao Muklum, Gumshem ai Myen Hpyen Dap hpe ninghkap n-gun madun CDM kaw shanglawm ai hpaji jawng magam gun ni hpe CDM kaw bai n shang lawm na matu Putao Muklum Hpaji Du kawn Muklum Hpaji Rung kaw March shata 9 ya shani kaw nna shagyeng ta masat sa htu shangun ai lam na chye lu ai.

CDM matut galaw ai ni hpe shata shabrai dawm kau ya na rai nna, CDM galaw ai gaw kaja wa myit dawdan na galaw ai nre, masha ni galaw ai majaw bawnu n-kring na galaw hkrup kau ai re ngu hkam la shangun nhtawm, CDM hta bai nshang lawm na matu shagyeng ta masat sa htu shangun ai lam, Putao ginra masha langai tsun ai.

Ta masat htu shangun ai hta, CDM kaw shang lawm ai magam gun ni hpe matsun hte ta masat sa htu shangun ai majaw, htu kau ai ni nga ai zawn, nsa htu ai ni mung nga ai re sha n-ga, kaga magam dap ni hta mung ta masat sa htu ai hte nhtu ai hpan lahkawng byin taw ai re lam, salang wa matut tsun ai.

Ya na zawn Putao Muklum kata na magam gun ni hpe lam amyu myu hku nna galaw ai lam gaw, shanhte hpe kamhpa shamyet shanat nga ai kun dinghku masha ni a matu grai yak hkak ai de shadu shangun ai ngu mu mada ai lam ginra masha ni tsun ai kaw na chye lu ai.

Photo Credit; fb