KIA Masat (26) Dap Dung ni hte Myen Hpyen Dap ni gasat poi laja lana byin

Hpakant Ginwang, KIA Masat (9) Dap Ba kata, Masat (26) Dap Dung hpyen hpung ni hte Tamahkan Sezin kaw dap jung shara jahkrat nga ai Myen Hpyen Dap, Hk.L.Y (119) hpyen hpung ni Sezin mare makau kaw March shata 11 ya jahpawt hkying 3:00am aten, laja lana gasat poi byin ai hta, KIA hpyen hpung ni padang dip la lu ai lam na chye lu ai.

Myen Hpyen Dap maga hkra machyi ai lam nga ai hte hpyen arung arai ni hpe mung KIA hpyen hpung ni zing la lu ai lam, jahpawt hkying 7:00am aten daram hta sha, KIA Masat (26) Dap Dung Hpyen Dap hpe Myen Hpyen Dap kawn nbung li (6) daram hte wa htim gap ai lam nga ai hta, KIA maga hkra machyi ai lam nnga ai re nga nna, shawng lam shisawk ni tsun ai.

Gasat poi byin ai shara gaw mare hte ni kahtep ai raitim, mung mare masha ni hta hkra machyi ai lam nnga ai re hpe na chye lu ai.

Hpakant Tamahkan hte Kamai mare du hkra gaw, Myen Hpyen Dap, Dapnu (33) kata na hpyen hpung ni dap jung shara jahkrat tawn ai ginra rai nna, hpyen shamu shamawt ai masa hta hkan nna matut manoi gasat poi byin wa na re lam, shawng lam shisawk ni tsun maram da ai kaw na chye lu ai.

Photo Credit; fb