MMA One Championship ginsup ninghkring Nsang Awng La Myitkyina nta kaw du nga
MMA One Championship ginsup ninghkring langai rai nga ai Nsang Awng La gaw, April praw 02 ya jahpawt hkying 08:30am aten daram hta Myitkyina nta hta du nga sai lam na chye
lu ai. Nsang Awng La gaw, American mungdan hta shaning 10 ning jan nga mat ai hpang ya she Myitkyina nta de du wa lu ai re. Shi du wa ai hpe Wungpawng Shingni Hpung hte buga na kanu kawa ni mung kabu gara hkap tau hkalum la ai lam na chye lu ai.
Shani nawku hpawng hpe Waimaw, Mukchik nawku jawng hta sa du shanglawm nna, 13 lang na Waimaw ginwang Hkalup hpung ginjaw a hpung shawa zuphpawng hta mung sa du nna, kanu kawa ni hpe, n gun jaw ga tsun ai lam, Hpung a kanu kawa ni kawn mung Nsang Awng La hpe Jinghpaw soi nhpye n-ga hte shagrau sha-a masat masa galaw ya ai lam, buga hpung sara langai tsun ai kawn chye lu ai.
Shana maga hkying 03:00pm aten daram hta Waimaw Bawng Ring IDP Camp hta mung sa du gawan n-gun jaw ga tsun nna, 21 လက္မ TV langai hte gumhpraw lap 500,000 ( Sen manga ) mung garum jaw da ai lam, dabang na salang langai tsun ai kawn chye lu ai.
Shana hkying 06:00pm aten hta Shatapru Manau wang kaw Shingni Hpung Ginjaw kaw na shagrau sha-a lamang hpe galaw ai lam na chye lu ai.
